នាព្រឹកថ្ងៃអង្គារ ១៥កើត ខែផល្គុន ឆ្នាំម្សាញ់ សប្តស័ក ពុទ្ធស័ករាជ ២៥៦៩ ត្រូវនឹងថ្ងៃទី៣ ខែកុម្ភៈ ឆ្នាំ២០២៦ គណៈប្រតិភូគណៈកម្មការនីតិកម្ម និងយុត្តិធម៌នៃព្រឹទ្ធសភា (គណៈកម្មការទី៦) ដឹកនាំដោយលោកជំទាវបណ្ឌិត ចាន់ សុទ្ធាវី ប្រធានគណៈកម្មការ ដោយមានការចូលរួមសហការយ៉ាងជិតស្និតពីអគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ បានអញ្ជើញជួបពិភាក្សាការងារជាមួយក្រុមប្រឹក្សាឃុំ សង្កាត់ ស្មៀន នាយប៉ុស្តិ៍នគបាលរដ្ឋបាលឃុំ សង្កាត់ និងមន្រ្តីមានសមត្ថកិច្ចពាក់ព័ន្ធ មកពីស្រុកមណ្ឌលសីមា ក្រុងខេមរភូមិន្ទ និងស្រុកកោះកុង ខេត្តកោះកុង សរុបចំនួន១១០នាក់ ស្តីពីការចុះបញ្ជីអត្រានុកូលដ្ឋាន នៅសាលមហោស្របខេត្តកោះកុង។
ក្នុងឱកាសនោះ លោកជំទាវបណ្ឌិត បាននាំនូវប្រសាសន៍ផ្តាំផ្ញើសួរសុខទុក្ខ ប្រកបដោយសេចក្តីនឹករឭកពីសំណាក់ថ្នាក់ដឹកនាំព្រឹទ្ធសភា និងជម្រាបពីគោលបំណងពិភាក្សា និងពង្រឹងតួនាទី ភារកិច្ច និងសមត្ថកិច្ចរបស់ក្រុមប្រឹក្សាឃុំ-សង្កាត់ និងអាជ្ញាធរមានសមត្ថកិច្ច ស្របតាមបទប្បញ្ញត្តិច្បាប់ពាក់ព័ន្ធនឹងការផ្តល់សេវាសាធារណៈជូនប្រជាពលរដ្ឋ។
នៅក្នុងកិច្ចពិភាក្សានោះ លោក ឈេង សុវណ្ណដា អភិបាលស្តីទី នៃគណៈអភិបាលខេត្តបានរាយការណ៍ និងឯកឧត្តម ផុន លីវិរៈ អគ្គនាយករង តំណាងអគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ បានមានចំណាប់អារម្មណ៍ដោយគូសបញ្ជាក់អំពីកិច្ចខិតខំប្រឹងប្រែងរបស់អគ្គនាយកដ្ឋាននៃក្រសួងមហាផ្ទៃ ក្នុងការពង្រឹងប្រសិទ្ធិភាពនៃការអនុវត្តច្បាប់ ព្រមទាំងបានថ្លែងអំណរគុណជាពិសេសគោរពជូនចំពោះ លោកជំទាវបណ្ឌិត ដែលបានបន្សល់ស្នាដៃ (នៅពេលលោកជំទាវបណ្ឌិត ជារដ្ឋលេខាធិការប្រចាំការនៃក្រសួងយុត្តិធម៌) បានដឹកនាំរៀបចំច្បាប់ស្តីពី «អត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម» ប្រកបដោយសមត្ថភាពខ្ពស់ និងទេពកោសល្យដ៏ប៉ិនប្រសប់រហូតដល់បានទទួលជោគជ័យ គួរជាទីមោទនៈ…។
ប្រភព៖ នាយកដ្ឋានព័ត៌មាន
