នាថ្ងៃទី១ ខែមេសា ឆ្នាំ២០២៦ នៅវិមានសាមគ្គីភាព ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា បានអញ្ជើញជាអធិបតីក្នុងពិធីបិទបទបង្ហាញស្តីពី «ការបោសសម្អាត និងប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (Online Scams) នៅកម្ពុជា»។ ក្នុងឱកាសនោះ ឯកឧត្តមបណ្ឌិត បានសង្កត់ធ្ងន់លើចំណុចគន្លឹះសំខាន់ៗដូចខាងក្រោម៖
- ត្រូវបញ្ជាក់ឱ្យច្បាស់ថា «ប្រជាជនកម្ពុជាមិនមែនជាឧក្រិដ្ឋជនទេ ប៉ុន្តែកម្ពុជាគឺជាប្រទេសរងគ្រោះ ដោយសារឧក្រិដ្ឋជនបរទេសបានលួចជ្រកកោនប្រើប្រាស់ទឹកដីកម្ពុជាធ្វើសកម្មភាពខុសច្បាប់»។
-អំពាវនាវឱ្យមានការបន្តពង្រឹងការអនុវត្តច្បាប់ កិច្ចសហប្រតិបត្តិការអន្តរជាតិ (ជាពិសេសជាមួយ FBI UNODC បណ្តាប្រទេសមេគង្គ-ឡាងឆាងLMC និងដៃគូអន្តរជាតិ) និងជំរុញការអប់រំផ្សព្វផ្សាយដល់ពលរដ្ឋឱ្យយល់ដឹងពីល្បិចកលបោកប្រាស់ ដែលវិវត្តលឿន និងថ្មីៗ។
ជាទីបញ្ចប់ ឯកឧត្តមបណ្ឌិត បានលើកទឹកចិត្ត ឱ្យសមាជិកព្រឹទ្ធសភា និងរដ្ឋសភា យកចិត្តទុកដាក់បញ្ហាជីវភាពរស់របស់ប្រជាពលរដ្ឋនៅមូលដ្ឋាន និងជួយតាមដាន ផ្តល់ព័ត៌មានដល់អាជ្ញាធរដើម្បីបោសសម្អាតបទល្មើសឆបោកនេះ។ ក្រោមការដឹកនាំផ្ទាល់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី និងការគាំទ្រពីស្ថាប័ននីតិប្បញ្ញត្តិ កម្ពុជា នឹងទទួលបានជោគជ័យក្នុងការលុបបំបាត់បទល្មើសឆបោកបច្ចេកវិទ្យា ដើម្បីសុវត្ថិភាពពលរដ្ឋ និងកិត្យានុភាពជាតិ។
ខ្លឹមសារ៖ ខុទ្ទកាល័យឯកឧត្តមអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន
