នារសៀលថ្ងៃទី២៥ ខែមេសា ឆ្នាំ២០២៦ លោកជំទាវ ឃួន ឃុនឌី លេខាធិការគណៈកម្មការទី៨ព្រឹទ្ធសភា និងជាអនុប្រធានក្រុមសមាជិកព្រឹទ្ធសភាប្រចាំភូមិភាគទី៨ បានអញ្ជើញជាអធិបតីក្នុងពិធីបុណ្យឆ្លងសាលាពុទ្ធិកបឋមសិក្សា និងសមិទ្ធផលនានា បញ្ចុះបឋមសិលាកសាងខ្លោងទ្វារជ័យ វត្តបាគង ឃុំត្បែង ស្រុកកំពង់ស្វាយ ខេត្តកំពង់ធំ អមដំណើរដោយ លោកជំទាវ យស ថានារី អ្នកតំណាងរាស្ត្រមណ្ឌលកំពង់ធំ លោកជំទាវអភិបាលរងខេត្ត លោកអភិបាលស្រុក លោក លោកស្រីសមាជិកក្រុមប្រឹក្សាស្រុក លោក លោកស្រីអភិបាលរងស្រុក និងមន្ត្រីរដ្ឋបាលសាលាស្រុកកំពង់ស្វាយ កងកម្លាំងទាំង៣ក្នុងស្រុក អាជ្ញាធរភូមិ ឃុំ ព្រមទាំងលោកគ្រូ អ្នកគ្រូ សិស្សានុសិស្ស និងប្រជាពលរដ្ឋចូលរួមសរុបចំនួន៥៦៤នាក់ ស្ថិតនៅវត្តបាគង ភូមិបាគង ឃុំត្បែង ស្រុកកំពង់ស្វាយ ខេត្តកំពង់ធំ។
នាឱកាសនោះ លោកជំទាវបាននាំនូវប្រសាសន៍ផ្តាំផ្ញើសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា សម្តេចកិត្តិព្រឹទ្ធបណ្ឌិត ព្រមទាំងថ្នាក់ដឹកនាំព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ដែលតែងតែគិតគូពីសុខទុក្ខបងប្អូនប្រជាពលរដ្ឋជានិច្ចកាល។ លោកជំទាវបានបន្តមានប្រសាសន៍ថា កត្តាដែលនាំឱ្យយើងបានធ្វើពិធីបុណ្យឆ្លងសមិទ្ធផលនេះឡើងក៏ដោយសារប្រទេសជាតិមានសុខសន្តិភាព ស្ថិរភាពនយោបាយ ដូច្នេះចំពោះសភាពការណ៍បច្ចុប្បន្ន យើងទាំងអស់គ្នាត្រូវរួបរួមគ្នា សាមគ្គីភាពគ្នា តស៊ូជាមួយគ្នា ក្នុងគ្រាដ៏បាកនេះ ហើយត្រូវជឿជាក់លើការដឹកនាំរបស់រាជរដ្ឋាភិបាល ។
លោកជំទាវបានថ្លែងអំណរព្រះគុណ និងអរគុណដល់ព្រះគ្រូចៅអធិការវត្ត លោកអាចារ្យ គណៈកម្មការវត្ត ពុទ្ធបរិស័ទ និងសប្បុរសជនទាំងអស់ ដែលបានចូលរួមតាមកម្លាំងសទ្ធាជ្រះថ្លា កសាងសមិទ្ធផលនានាទាំងអស់នេះ។
នាឱកាសនោះដែរ លោកជំទាវបានប្រគេនបច្ច័យសម្រាប់កសាងវត្តមួយចំនួន, ជូនតាជី យាយជីចំនួន៣០នាក់, ជូនលោកគ្រូ អ្នកគ្រូចំនួន១២នាក់, ជូនសិស្សានុសិស្សចំនួន២០០នាក់, ជូនអ្នកកាន់ខ្សែបូ, ជូនរបាំជូនពរ, និងជូនប្រជាពលរដ្ឋ ចំនួន២៧៦នាក់ ម្នាក់ៗទទួលបានសារុងចំនួន១។
ប្រភព៖ ជំនួយការលោកជំទាវ ឃួន ឃុនឌី
