ក្នុងកិច្ចប្រជុំបូកសរុបការងារខុទ្ទកាល័យ ប្រចាំខែមេសា នារសៀលថ្ងៃទី២៧ ខែមេសា ឆ្នាំ ២០២៦ ឯកឧត្តមបណ្ឌិត ធន់ វឌ្ឍនា អនុប្រធានទី២ នៃព្រឹទ្ធសភា បានដាក់ចេញនូវអនុសាសន៍ដឹកនាំជាយុទ្ធសាស្ត្រ ដើម្បីជំរុញវឌ្ឍនភាពការងារ ដូចខាងក្រោម៖
- សុខភាព និងសមត្ថភាពជាគ្រឹះ៖ ការលើកកម្ពស់ជីវភាពប្រជាជន ត្រូវចាប់ផ្ដើមពីការបង្កើនសមត្ថភាព (ភាសាអង់គ្លេស និងបច្ចេកវិទ្យា) ផ្សារភ្ជាប់នឹងការយកចិត្តទុកដាក់លើសុខភាពជាចម្បង ក្នុងនោះគឺអាហារូបត្ថម្ភ។
- ការតាមដានស្ថានភាពសេដ្ឋកិច្ច និងផលប៉ះពាល់៖ ត្រូវយកចិត្តទុកដាក់តាមដានយ៉ាងដិតដល់នូវស្ថានភាពវិបត្តិធនាគារ និងផលប៉ះពាល់នានាមកលើជីវភាពប្រជាពលរដ្ឋ ដើម្បីបង្ការហានិភ័យផ្សេងៗទៀត។
- បច្ចេកវិទ្យាជំរុញផលិតកម្ម៖ ជំរុញការស្រាវជ្រាវ បង្កាត់គ្រាប់ពូជថ្មីៗ ដូចជាគ្រាប់ពូជកាកាវ ជាដើមដែលជាដំណាំមានតម្លៃថ្លៃ និងដាក់បញ្ចូលបច្ចេកវិទ្យាថ្មីៗ ទាំងក្នុងសង្វាក់ផលិតកម្ម និងការលក់នៅតាមទីផ្សារ ដូចជាការច្នៃ ម៉ាស៊ីនលក់ផលិតផលខ្មែរដោយស្វ័យប្រវត្ត (Vending Machine) ដើម្បីបង្កើនផលិតភាព និងសមត្ថភាពប្រកួតប្រជែងលើទីផ្សារ។
- ការត្រៀមទទួលនាវាពេទ្យ Peaceland៖ រៀបចំផែនការឱ្យបានហ្មត់ចត់ ដើម្បីទទួលស្វាគមន៍បេសកកម្មមនុស្សធម៌របស់ នាវាពេទ្យនៃអង្គការ Peaceland ដែលនឹងមកដល់កម្ពុជានៅខែតុលា ខាងមុខនេះ ដើម្បីផ្តល់សេវាពិនិត្យព្យាបាលជូនប្រជាពលរដ្ឋ។
នៅទីបញ្ចប់ ឯកឧត្តមបណ្ឌិត បានជំរុញឱ្យក្រុមការងារបន្តពង្រីកបណ្ដាញទំនាក់ទំនងជាតិ និងអន្តរជាតិ ព្រមទាំង អនុវត្តទិសដៅការងារទាំងនេះឱ្យសម្រេចបានលទ្ធផលផ្លែផ្កាជូនជាតិមាតុភូមិ។
ខ្លឹមសារ៖ ខុទ្ទកាល័យឯកឧត្តមអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន
