នាព្រឹកថ្ងៃព្រហស្បតិ៍ ៥កើត ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២១ ខែឧសភា ឆ្នាំ២០២៦ គណៈកម្មការសិទ្ធិមនុស្ស ទទួលពាក្យបណ្តឹង និងអង្កេត នៃព្រឹទ្ធសភា (គណៈកម្មការទី១) ដឹកនាំដោយ ឯកឧត្តម ងី ច័ន្ទ្រផល ប្រធានគណៈកម្មការ បានទទួលជួបពិភាក្សាការងារជាមួយថ្នាក់ដឹកនាំអជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក) ដឹកនាំដោយឯកឧត្តម ជិន ម៉ាលីន រដ្ឋលេខាធិការប្រចាំការនៃក្រសួងយុត្តិធម៌ ដើម្បីឈ្វេងយល់អំពីវឌ្ឍនភាពការងាររបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក) និងកិច្ចសហការការងារ នៅសាលភក្តីវិក្រម៣វិមានព្រឹទ្ធសភា។
ក្នុងឱកាសនោះ ឯកឧត្តម ងី ច័ន្ទ្រផល បាននាំយកនូវបណ្តាំផ្ញើសួរសុខទុក្ខ ប្រកបដោយសេចក្តីនឹករលឹកពីសំណាក់ថ្នាក់ដឹកនាំព្រឹទ្ធសភា ជូនដល់ថ្នាក់ដឹកនាំ អ.ដ.ក និងជម្រាបជូនអំពីសាវតា រចនាសម្ព័ន្ធ តួនាទី ភារកិច្ច និងសមត្ថកិច្ចរបស់ព្រឹទ្ធសភា ក៏ដូចជាគណៈកម្មការ។ ជាមួយនេះ ឯកឧត្តមបានរំលេចអំពីការងារស្នូលរបស់គណ:កម្មការ គឺការងារសិទ្ធិមនុស្ស និងការងារទទួលពាក្យបណ្តឹង ដែលជាកិច្ចការមួយពាក់ព័ន្ធនឹងការងាររបស់ក្រសួង ដែលត្រូវមានកិច្ចសហការជាមួយគ្នា ដើម្បីដោះស្រាយឆ្លើយតបទៅនឹងតម្រូវការរបស់ប្រជាពលរដ្ឋ។ បន្ថែមពីនេះ ឯកឧត្តមក៏បានគូសបញ្ជាក់អំពីអាទិភាពការងារចម្បងចំនួន២ របស់ព្រឹទ្ធសភានីតិកាលទី៥ គឺការលើកកម្ពស់ការទូតសភា និងការរួមប្រាស្រ័យឱ្យកាន់តែជិតស្និទ្ធជាមួយអង្គបោះឆ្នោត ជាពិសេសក្រុមប្រឹក្សាឃុំ សង្កាត់ ដែលជាតំណាងប្រជាពលរដ្ឋនៅមូលដ្ឋាន។
ក្នុងនាមថ្នាក់ដឹកនាំ អ.ដ.ក ដែលជាសេនាធិការរបស់រាជរដ្ឋាភិបាល ឯកឧត្តម ជិន ម៉ាលីន បានគោរពថ្លែងអំណរគុណចំពោះសម្តេចតេជោ ប្រធានព្រឹទ្ធសភា ក៏ដូចជាឯកឧត្តមប្រធានគណៈកម្មការទី១ព្រឹទ្ធសភា ដែលបានផ្តល់ឱកាស និងកិត្តិយសដល់ថ្នាក់ដឹកនាំ អ.ដ.ក បានមកជួបពិភាក្សាការងារ និងបង្ហាញពីវឌ្ឍនភាព និងសមិទ្ធផលសំខាន់ៗរបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ។
ក្នុងជំនួបពិភាក្សានោះ ឯកឧត្តម ជិន ម៉ាលីន បានបង្ហាញអំពីការរៀបចំដំណើរការស្ថាប័ន, ការរៀបចំលិខិតបទដ្ឋានគតិយុត្ត និងគោលការណ៍ណែនាំ, ការរៀបចំចំណាត់ការសំណុំរឿងក្នុងក្របខណ្ឌនៃ អ.ដ.ក , ការអនុវត្តគម្រោងចុះដោះស្រាយវិវាទជូនប្រជាពលរដ្ឋនៅតំបន់ជនជាតិភាគតិច និងតំបន់ដាច់ស្រយាល, កិច្ចសហប្រតិបត្តិការជាតិ និងអន្តរជាតិ, ការងារសាធារណមតិ និងការផ្សព្វផ្សាយ ,បញ្ហាប្រឈម និងទិសដៅបន្តដែលត្រូវអនុវត្តបន្ត។
ក្រោយពីបានស្តាប់សេចក្តីរាយការណ៍រួចមក សមាជិក សមាជិកា នៃគណៈកម្មការទាំង១០ព្រឹទ្ធសភា ក៏បានមានការចូលរួមមតិយោបល់ លើកជាសំនួរ និងមានការបកស្រាយពីឯកឧត្តមរដ្ឋលេខាធិការ និងមន្ត្រីជំនាញនៃ អ.ដ.ក ផងដែរ។
នៅទីបញ្ចប់ ឯកឧត្តម ងី ច័ន្ទ្រផល បានវាយតម្លៃខ្ពស់ និងកោតសរសើរចំពោះការដឹកនាំរបស់ឯកឧត្តមរដ្ឋលេខាធិការ និងសហការីទាំងអស់ ដែលបានខិតខំបំពេញការងារដោះស្រាយបញ្ហាទំនាស់ ក៏ដូចជាវិវាទផ្សេងៗក្រៅប្រព័ន្ធតុលាការជូនប្រជាពលរដ្ឋ ទោះបីមានបញ្ហាប្រឈមមួយចំនួន គឺសម្រេចបានសមិទ្ធផលសំខាន់ៗ និងគំនិតផ្តួចផ្តើមជាយុទ្ធសាស្ត្រដែលអាចធានាបាននូវប្រសិទ្ធភាពក្នុងការដឹកនាំនិងគ្រប់គ្រងអាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក) កាន់តែល្អប្រសើរ។ ទន្ទឹមនឹងនេះ ឯកឧត្តមបានស្នើឱ្យ អ.ដ.ក ជំរុញនូវការផ្សព្វផ្សាយព័ត៌មានចំពោះការដោះស្រាយវិវាទក្រៅប្រព័ន្ធតុលាការឱ្យបានទូលំទូលាយជូនដល់សាធារណជន និងប្រើបច្ចេកវិទ្យានិម្មិតអេអាយ (Ai) ដើម្បីជួយសម្រួលដល់កិច្ចការដោះស្រាយវិវាទផងដែរ៕
ប្រភព៖ នាយកដ្ឋានព័ត៌មាន
