នារសៀលថ្ងៃសុក្រ ៦កើត ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២២ ខែឧសភា ឆ្នាំ២០២៦ ឯកឧត្តម អ៊ុច បូររិទ្ធ ប្រធានស្តីទីព្រឹទ្ធសភា បានអញ្ជើញគោរពវិញ្ញាណក្ខន្ធសព មហាឧបាសិកា សៀក ផល ម្តាយបង្កើតរបស់ឯកឧត្តម ញ៉ែម សាម៉ន សមាជិកគណៈកម្មការទី៩ព្រឹទ្ធសភា និងជាសមាជិកក្រុមសមាជិកព្រឹទ្ធសភាប្រចាំភូមិភាគទី៨ ដែលបានទទួលមរណភាព កាលពីថ្ងៃពុធ ទី២០ ខែឧសភា ឆ្នាំ២០២៦ វេលាម៉ោង ១៤:៤០នាទី ក្នុងជន្មាយុ៨៦ឆ្នាំ ដោយជរាពាធ។
ក្នុងឱកាសប្រកបដោយទុក្ខដ៏ក្រៀមក្រំ និងសោកសង្រេងនេះ ឯកឧត្តមប្រធានស្តីទីព្រឹទ្ធសភា បានធ្វើអភិវន្ទនកិច្ចចូលរួមរំលែកមរណទុក្ខជាមួយឯកឧត្តម និងលោកជំទាវ ព្រមទាំងក្រុមគ្រួសារ ចំពោះការបាត់បង់ដ៏ធំធេងនូវម្តាយបង្កើត ម្តាយក្មេក និងជីដូន ដែលជាទីគោរពស្រឡាញ់ដ៏ជ្រាលជ្រៅ និងមានព្រហ្មវិហាធម៌ដ៏ល្អប្រពៃ អប់រំ ទូន្មាន កូន ចៅ ឱ្យក្លាយជាធនធានដ៏មានតម្លៃ និងមានកិរិយាមារយាទថ្លៃថ្នូរសម្រាប់សង្គមជាតិ។ លើសពីនេះ មរណភាពរបស់មហាឧបាសិកា សៀក ផល គឺជាការបាត់បង់ពុទ្ធសាសនិកមួយរូប ដែលតែងតែគោរពប្រតិបត្តិយ៉ាងខ្ជាប់ខ្ជួនក្នុងព្រះពុទ្ធសាសនា។ សូមឧទ្ទិសបួងសួងដល់ដួងវិញ្ញាណក្ខន្ធ មហាឧបាសិកា សៀក ផល បានទៅសោយសុខក្នុងសុគតិភពកុំបីឃ្លៀងឃ្លាតឡើយ។
សពមហាឧបាសិកា សៀក ផល ត្រូវបានតម្កល់និងធ្វើបុណ្យតាមប្រពៃណីព្រះពុទ្ធសាសនា នៅភូមិបាក់ខែង សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ៕
ប្រភព៖ នាយកដ្ឋានព័ត៌មាន
