នារសៀលថ្ងៃទី២៥ ខែឧសភា ឆ្នាំ២០២៦ នៅសាលខុទ្ទកាល័យអនុប្រធានទី២ព្រឹទ្ធសភា នៃវិមានសាមគ្គីភាព ក្រោមអធិបតីភាពដ៏ខ្ពង់ខ្ពស់របស់ឯកឧត្តមបណ្ឌិតអនុប្រធានទី២ ព្រឹទ្ធសភា បានដឹកនាំកិច្ចប្រជុំប្រចាំខែរបស់ខុទ្ទកាល័យ ដើម្បីវាយតម្លៃលើលទ្ធផលការងារ និងដាក់ចេញទិសដៅការងារសំខាន់ៗនាពេលខាងមុខ។
ក្នុងឱកាសនោះ ឯកឧត្តមបណ្ឌិត បានមានប្រសាសន៍ស្វាគមន៍យ៉ាងកក់ក្តៅចំពោះសមាជិកថ្មី និងបានសង្កត់ធ្ងន់លើស្មារតីនៃការធ្វើការងារជាក្រុម (Teamwork) ដើម្បីពង្រឹងយន្តការការងារឱ្យកាន់តែមានប្រសិទ្ធភាព។ ទន្ទឹមនឹងនេះ ឯកឧត្តមបណ្ឌិត មាន ប្រសាសន៍ថា ក្នុងមុខងារនីតិកម្ម និងការតាមដានការអនុវត្តច្បាប់ ដែលទាមទារឱ្យសមាជិកខុទ្ទកាល័យទាំងអស់ ត្រូវពង្រឹងសមត្ថភាពជួយព្រឹទ្ធសភា ស្រាវជ្រាវឱ្យបានច្បាស់លាស់ ស៊ីជម្រៅ និងមានមូលដ្ឋានវិទ្យាសាស្ត្ររឹងមាំ ដូចជាក្នុងវិស័យធនាគារ និងយន្តការច្បាប់ក្នុងការបង្ក្រាប និងប្រឆាំងបទល្មើសបច្ចេកវិទ្យាអនឡាញ ដែលកំពុងជាបញ្ហាប្រឈមរូបវន្តនាពេលបច្ចុប្បន្ន។ បន្ថែមលើនេះ ឯកឧត្តមបណ្ឌិត ក៏បានផ្តល់ការណែនាំលើការងារព័ត៌មាន ដោយត្រូវផ្សព្វផ្សាយឱ្យឆ្លុះបញ្ចាំងពីទស្សនវិស័យគន្លឹះរបស់ឯកឧត្តមក្នុងការលើកកម្ពស់វិស័យអប់រំនៅតាមតំបន់ជនបទដាច់ស្រយាល តាមរយៈស្មារតីជួយគ្នាទៅវិញទៅមក និងការផ្តល់អាហារូបករណ៍ ដើម្បីជួយឱ្យកុមារនៅជនបទមានឱកាសទទួលបានចំណេះដឹង និងអាចចេះភាសាអង់គ្លេសបានជ្រៅជ្រះដូចកុមារនៅទីក្រុងផងដែរ។ ជាចុងក្រោយ ដើម្បីត្រៀម លក្ខណៈឱ្យបានហ្មត់ចត់សម្រាប់ទិសដៅការងារខាងមុខ កិច្ចប្រជុំប្រចាំខែនេះក៏បានពិភាក្សា និងរៀបចំផែនការសកម្មភាពយ៉ាងលម្អិតលើបេសកកម្មការងារក្រៅប្រទេសចំពោះមុខចំនួនពីរ ដែលត្រូវអនុវត្ត គឺដំណើរទស្សនកិច្ចផ្លូវការរបស់គណៈប្រតិភូទៅកាន់សាធារណរដ្ឋប្រជាមានិតចិន និងប្រទេសអាហ្សាក់បៃហ្សង់ ក្នុងពេលឆាប់ៗខាងមុខនេះ ដើម្បីពង្រឹងការទូតសភា ចំណងមិត្តភាព និងកិច្ចសហប្រតិបត្តិការទ្វេភាគីឱ្យកាន់តែស្អិតរមួត។

ខ្លឹមសារ៖ ខុទ្ទកាល័យឯកឧត្តមអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន