ក្នុងពិធីសំណេះសំណាលជាមួយក្រុមប្រឹក្សាសង្កាត់ទាំង៧ ក្នុងខណ្ឌមានជ័យ រាជធានីភ្នំពេញ នាល្ងាចថ្ងៃទី១៦ ខែកក្កដា ឆ្នាំ២០២៦ ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា បានលើកទឹកចិត្ត ឱ្យអាជ្ញាធរមូលដ្ឋានគ្រប់លំដាប់ថ្នាក់ ជំរុញពលរដ្ឋទៅចុះឈ្មោះនិងពិនិត្យឈ្មោះបោះឆ្នោត ព្រមទាំងបានអំពាវនាវឱ្យគ្រប់គណបក្ស លើកទឹកចិត្តស្រ្តីនិងយុវជន ឈរឈ្មោះជាបេក្ខជន ក្នុងការបោះឆ្នោតក្រុមប្រឹក្សាឃុំ-សង្កាត់ ឆ្នាំ២០២៧។
ក្នុងឱកាសនោះ ឯកឧត្តមបណ្ឌិត ក៏បានជំរុញអាជ្ញាធរមូលដ្ឋាន ឱ្យខិតខំបម្រើសេវាសាធារណៈ ជូនប្រជាពលរដ្ឋឱ្យបានគាប់ចិត្ត និងយកចិត្តទុកដាក់លើការងារសន្តិសុខ សេដ្ឋកិច្ច សង្គមសោភ័ណភាពក្រុង និងបង្ក្រាបការឆបោក។
ឯកឧត្តមបណ្ឌិត ធន់ វឌ្ឍនា ក៏បានលើកអំពីការរីកចម្រើនគួរឱ្យកត់សម្គាល់ក្នុងខណ្ឌមានជ័យ ក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន រហូតដល់បច្ចុប្បន្ន ដោយមានប្រសាសន៍ថា តែមួយជំនាន់ប៉ុណ្ណោះ ខណ្ឌមានជ័យបានផ្លាស់ប្តូរពីទីវាលស្ងប់ស្ងាត់ ទៅជាទីប្រជុំជនរស់រវើក មានប្រជាពលរដ្ឋរស់នៅ រៀនសូត្រ ធ្វើអាជីវកម្ម ធ្វើការ និងកសាងអនាគតរបស់ពួកគេ។
ជាមួយការរីកចម្រើនយ៉ាងឆាប់រហ័សនេះ ក៏មានបញ្ហាប្រឈមថ្មីៗផងដែរ ហើយ ឯកឧត្តមបណ្ឌិត បានបញ្ជាក់យ៉ាងច្បាស់ថា ត្រូវពង្រឹងអភិបាលកិច្ចល្អ ក្នុងការគ្រប់គ្រងខណ្ឌ ដើម្បីបន្តទទួលបានស្ថេរភាព និងវិបុលភាពសម្រាប់ទាំងអស់គ្នា៕
ខ្លឹមសារ៖ ខុទ្ទកាល័យឯកឧត្តម អនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន
