នាព្រឹកថ្ងៃចន្ទ ១៥រោច ខែពិសាខ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី៣០ ខែឧសភា ឆ្នាំ២០២២ ឯកឧត្តមកិត្តិនីតិកោសលបណ្ឌិត ម៉ុម ជឹមហ៊ុយ ប្រធានគណៈកម្មការទី៧ ព្រឹទ្ធសភា និងជាអនុប្រធានក្រុមសមាជិកព្រឹទ្ធសភា ប្រចាំភូមិភាគទី១ បានអញ្ជើញចុះជួបសំណេះសំណាល ជាមួយក្រុមប្រឹក្សាសង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ ដើម្បីស្តាប់ពីស្ថានភាពការងារសន្តិសុខសណ្តាប់ធ្នាប់សាធារណៈ និងការងារផ្តល់សេវាជូនប្រជាពលរដ្ឋ។ ក្រោយពីបានស្តាប់របាយការណ៍រួចមក ឯកឧត្តមប្រធាន បានសម្តែងការកោតសរសើរដល់អាជ្ញាធរគ្រប់លំដាប់ថ្នាក់ ដែលបានប្រតិបត្តិនូវតួនាទីរបស់ខ្លួនក្នុងការផ្តល់សេវាជូនប្រជាពលរដ្ឋបានយ៉ាងប្រសើរ រក្សាបានសន្តិសុខ សណ្តាប់ធ្នាប់សាធារណៈ និងមានការរីកចំរើនផ្នែកហេដ្ឋារចនាសម័្ពន្ធបានយ៉ាងឆាប់រហ័ស ពិសេសក្នុងរយៈពេលនៃយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ដំណើរការបានដោយរលូន សុវត្ថិភាព និងគ្មានអំពើហិង្សា។ បន្ថែមលើនោះ ក៏បានផ្តាំផ្ញើដល់អាជ្ញាធរឱ្យបន្តយកចិត្តទុកដាក់លើការងារអភិវឌ្ឍន៍មូលដ្ឋាន ក៏ដូចជាការអនុវត្តគោលនយោបាយភូមិ-សង្កាត់មានសុវត្ថិភាព និងសំណូមពរឱ្យប្រជាពលរដ្ឋទាំងអស់អញ្ជើញទៅចូលរួមបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ដែលនឹងប្រព្រឹត្តទៅនៅថ្ងៃអាទិត្យ ទី៥ ខែមិថុនា ឆ្នាំ២០២២ ចាប់ពីម៉ោង ០៧:០០ ព្រឹក ដល់ម៉ោង ០៣:០០ រសៀល តាមការិយាល័យដែលបានចុះឈ្មោះ ដើម្បីបន្តរក្សា ពង្រឹងសន្តិភាព និងការអភិវឌ្ឍ។