ឯកឧត្តមកិត្តិនីតិកោសលបណ្ឌិត ម៉ុម ជឹមហ៊ុយ បានអញ្ជើញចុះជួបសំណេះសំណាល និងពិភាក្សាការងារជាមួយក្រុមប្រឹក្សាសង្កាត់កន្ទោក និងសង្កាត់បឹងធំ ខណ្ឌកំបូល រាជធានីភ្នំពេញ
ព្រឹកថ្ងៃអង្គារ ២កើត ខែផល្គុន ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី២១ ខែកុម្ភៈ ឆ្នាំ២០២៣ ឯកឧត្តមកិត្តិនីតិកោសលបណ្ឌិត ម៉ុម ជឹមហ៊ុយ ប្រធានគណៈកម្មការទី៧ ព្រឹទ្ធសភា និងជាអនុប្រធានក្រុមសមាជិកព្រឹទ្ធសភា ប្រចាំភូមិភាគទី១ បានអញ្ជើញចុះជួបសំណេះសំណាល និងពិភាក្សាការងារជាមួយក្រុមប្រឹក្សាសង្កាត់កន្ទោក និងសង្កាត់បឹងធំ ខណ្ឌកំបូល រាជធានីភ្នំពេញ ដើម្បីស្វែងយល់អំពីសភាពការណ៍រួមរបស់មូលដ្ឋាន។ បន្ទាប់ពីបានស្តាប់សេចក្តីរាយការណ៍រួចមក ឯកឧត្តមកិត្តិនីតិកោសលបណ្ឌិត បានសម្តែងការកោតសរសើរដល់អាជ្ញាធរ ដែលបានខិតខំបំពេញការងារដោយស្មារតីទទួលុខសត្រូវខ្ពស់ ធ្វើឱ្យមូលដ្ឋានមានការវិវត្តរីកចម្រើនជាបន្តបន្តាប់ លើកទឹកចិត្តឱ្យបន្តផ្តល់សេវាសាធារណៈជូនប្រជាជនប្រកបដោយប្រសិទ្ធភាព ធានាបានសន្តិសុខ សណ្តាប់ធ្នាប់សាធារណ ជាពិសេសការអនុវត្តគោលនយោបាយភូមិ សង្កាត់ មានសុវត្ថិភាព ចុះផ្ទាល់ជាមួយប្រជាពលរដ្ឋ ដើម្បីស្តាប់សំណូពរ និងបញ្ហាប្រឈមនានា ហើយខិតខំរួមគ្នាដោះស្រាយឱ្យអស់លទ្ធភាព ដោយប្រើប្រាស់កម្លាំងសរុប មធ្យោបាយសរុបធ្វើសកម្មភាពឱ្យបានព្រមៗគ្នា ដើម្បីទទួលបានជ័យជំនះនាពេលខាងមុខ។ ក្នុងឱកាសនោះបានឧបត្ថម្ភឧបករណ៍តេស្តរហ័សចំនួនពីរកេសធំ និងថវិកាមួយចំនួនផងដែរ។
