នៅរសៀលថ្ងៃពុធ ទី២៦ ខែកក្កដា ឆ្នាំ២០២៣ ឯកឧត្តម ឡៅ ឆន សមាជិកគណៈកម្មការទី៧ ព្រឹទ្ធសភា និងជាសមាជិកក្រុមសមាជិកព្រឹទ្ធសភា ប្រចាំភូមិភាគទី៤ និងលោកជំទាវ ព្រមទាំងបងប្អូនសាច់ញាតិ បានអញ្ជើញទៅចូលរួមបុណ្យផ្កាប្រាក់ និងប្រគេនទៀនព្រះវស្សា ព្រមទាំងទេយ្យវត្ថុ មានអង្ករ ទឹកត្រី ទឹកស៊ីអីវ ទឹកសុទ្ធ ភេសជ្ជៈ ស្កសរ និងថវិកា ចំនួន១.៣០០.០០០រៀល ដើម្បីវេរប្រគេនព្រះសង្ឃក្នុងពិធីបុណ្យនេះ ស្ថិតនៅវត្តនគរភាស ឃុំនគរភាស ស្រុកអង្គរជុំ ខេត្តសៀមរាប។ ក្នុងឱកាសនោះ ឯកឧត្តម បានផ្តាំផ្ញើរសួរសុខទុក្ខ និងថ្លែងអំណរគុណពី សម្តេចអគ្គមហាពញាចក្រី ហេងសំរិន, សម្តេចវិបុលសេនាភក្តី សាយ ឈុំ, សម្តេចក្រឡាហោម ស ខេង, សម្ដេចកិត្តិសង្គហបណ្ឌិត ម៉ែន សំអន និងសម្ដេចពិជ័យសេនា ទៀ បាញ់ ជាពិសេសពីសម្តេចអគ្គមហាសេនាបតីតេជោ ហ៊ុន សែន ដល់បងប្អូនលោកយាយ លោកតា កូនក្មួយ បានអញ្ជើញទៅបោះឆ្នោតយ៉ាងច្រើនកុះករកាលពីថ្ងៃទី២៣ ខែកក្កដា ឆ្នាំ២០២៣ កន្លងទៅនេះ ដោយប្រព្រឹត្តទៅដោយសេរី ត្រឹមត្រូវ និងយុត្តិធម៌ ស្របតាមគោលការណ៍លទ្ធិប្រជាធិបតេយ្យ សេរីពហុបក្ស។ ក្នុងពិធីខាងលើ ឯកឧត្តមបានឧបត្ថម្ភជូនលោកយាយ លោកតា ដែលបានអញ្ជើញចូលរួមសរុប ចំនួន១១៧នាក់ និងសិស្សក្រីក្រ ចំនួន១៨នាក់ អស់ថវិកា ចំនួន៤.៥៩០.០០០រៀល។