នៅព្រឹកថ្ងៃព្រហស្បតិ៍ ទី១៣ ខែ វិច្ឆិកា ឆ្នាំ២០២៥ ឯកឧត្តម អន ស៊ុ សមាជិកក្រុមសមាជិកព្រឹទ្ធសភាប្រចាំភូមិភាគទី៤ និងឯកឧត្ដម ឈើយ ចាន់ណា លេខាធិការគណ:កម្មការទី៧ព្រឹទ្ធសភា និងជាលេខាធិការក្រុមសមាជិកព្រឹទ្ធសភាប្រចាំភូមិភាគទី៤ រួមជាមួយ ឯកឧត្តម អុី ឡុង លោកជំទាវ នួម សុភ័ណ ឯកឧត្តម ខេង ស៊ុម អ្នកតំណាងរាស្រ្តមណ្ឌលខេត្តបន្ទាយមានជ័យ បានអញ្ជើញសួរសុខទុក្ខ និងយកថវិកាមួយចំនួនជូនដល់ប្រជាពលរដ្ឋចំនួន៣នាក់ ដែលរងរបួសដោយការបាញ់ប្រហារពីទាហានសៀមនៅមន្ទីរពេទ្យមិត្តភាពជប៉ុន-កម្ពុជា មង្គលបូរី។ អ្នករងរបួសទី១-ឈ្មោះ នី សុខម៉េង ភេទប្រុស អាយុ៣២ឆ្នាំ, ទី២ -ឈ្មោះ សូ ចំរ៉ុង ភេទប្រុស អាយុ៣៨ឆ្នាំ និងទី៣-ឈ្មោះ រិត ចាន់ធា ភេទប្រុស អាយុ២៩ឆ្នាំ។
នាឱកាសនោះ​ផងដែរ ឯកឧត្តម លោកជំទាវ អញ្ជើញបន្តទៅអុជធូប និងចូលរួមពិធីបុណ្យសពប្រជាពលរដ្ឋ១នាក់ទៀត មានឈ្មោះ ឌី ណៃ ហៅ សល់ ស្លាប់ដោយការបាញ់ប្រហារពីទាហានសៀម ដែលតម្កល់ធ្វើបុណ្យនៅវត្តចាន់សុីសាមគ្គីរតនារាម ឃុំកូប ស្រុកអូរជ្រៅ ខេត្តបន្ទាយមានជ័យ។​ ប្រជាពលរដ្ឋដែលរងរបួស និងស្លាប់នេះ ដោយការបាញ់ប្រហារពីទាហានសៀម នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ កាលពីរសៀលថ្ងៃទី១២ ខែវិច្ឆិកា ឆ្នាំ២០២៥។

ប្រភព៖ ការិយាល័យ​ជំនួយ​ការ​គណៈកម្មការ​ទី៧ព្រឹទ្ធសភា