នាព្រឹកថ្ងៃទី២១ ខែវិច្ឆិកា ឆ្នាំ២០២៥ ព្រឹទ្ធសភា នៃព្រះរាជាណាចក្រកម្ពុជា បានរៀបចំពិធីប្រកាសចូលកាន់តំណែងរបស់ ឯកឧត្តម ឌី បញ្ញា ជាអគ្គលេខាធិការរងព្រឹទ្ធសភា នីតិកាលទី៥ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម អ៊ុច បូររិទ្ធ អនុប្រធានទី១ព្រឹទ្ធសភា នៅវិមានព្រឹទ្ធសភា ដោយមានការអញ្ជើញចូលរួមពី ឯកឧត្តម លោកជំទាវថ្នាក់ដឹកនាំខុទ្ទកាល័យថ្នាក់ដឹកនាំព្រឹទ្ធសភា និងថ្នាក់ដឹកនាំអង្គភាពចំណុះអគ្គលេខាធិការដ្ឋានព្រឹទ្ធសភា។
មានមតិសំណេះសំណាលនាឱកាសនោះ ឯកឧត្តមអនុប្រធានទី១ ព្រឹទ្ធសភា បានរំលឹកថា ជាការចាប់ផ្ដើមនៃទំព័រប្រវត្តិសាស្រ្តថ្មីសម្រាប់ព្រឹទ្ធសភានីតិកាលទី៥ ក្រោមការដឹកនាំប្រកបដោយគតិបណ្ឌិត និងឈ្លាសវៃបំផុតរបស់ សម្តេចអគ្គមហាសេនាបតីតេជោ ប្រធានព្រឹទ្ធសភា នៃព្រះរាជាណាចក្រកម្ពុជា,  សម្តេចប្រធាន បានដាក់ចេញនូវអាទិភាពយុទ្ធសាស្រ្តពីរ ក្នុងចំណោមអាទិភាពទាំងឡាយរបស់ព្រឹទ្ធសភា គឺ  អាទិភាពចម្បងទី១៖ ការលើកកម្ពស់ការទូតសភា ដើម្បីចូលរួមបំពេញបន្ថែមលើសកម្មភាពដឹកនាំដោយរាជរដ្ឋាភិបាល និងរដ្ឋសភាក្នុងការលើកកម្ពស់សន្តិភាព សន្តិសុខ ស្ថិរភាព និងវិបុលភាពសម្រាប់តំបន់ និងសកលលោក និងអាទិភាពចម្បងទី២៖  ការរួមប្រាស្រ័យកាន់តែជិតស្និទ្ធជាមួយអង្គបោះឆ្នោត ជាពិសេសជាមួយសមាជិកក្រុមប្រឹក្សាឃុំសង្កាត់ ដែលតំណាងឱ្យប្រជាពលរដ្ឋនៅមូលដ្ឋាន ដើម្បីបន្តរួមចំណែកដល់ដំណើរការប្រជាធិបតេយ្យភាវូបនីយកម្ម កំណែទម្រង់វិមជ្ឈការ និងវិសហមជ្ឈការ ការលើកកម្ពស់គុណភាព និងប្រសិទ្ធភាពសេវាសាធារណៈ និងការអភិវឌ្ឍប្រទេសជាតិ។
ឆ្លៀតក្នុងឱកាសដ៏ប្រពៃថ្លៃថ្លានេះ ឯកឧត្តមអនុប្រធានទី១ ព្រឹទ្ធសភា បាន សម្ដែងការកោតសរសើរចំពោះ ឯកឧត្តមអគ្គលេខាធិការព្រឹទ្ធសភា ថ្នាក់ដឹកនាំ និងសហការី នៃអង្គភាពចំណុះអគ្គលេខាធិការដ្ឋានព្រឹទ្ធសភា ដែលបានខិតខំប្រឹងប្រែងបំពេញការងារអស់ពីកម្លាំងកាយចិត្ត ប្រាជ្ញា និងស្មារតី ដោយសម្រេចបានសមិទ្ធការងារសំខាន់ៗជាច្រើន ក្នុងរយៈពេល ១៩ ខែកន្លងមកនេះ  ជាពិសេសការងារអភិវឌ្ឍន៍ស្ថាប័ន  ការងារកំណែទម្រង់ ក៏ដូចជាការយកចិត្តទុកដាក់ខ្ពស់ក្នុងការផ្ដល់សេវាប្រកបដោយប្រសិទ្ធភាព ឆ្លើយតបទៅនឹងតម្រូវការរបស់ថ្នាក់ដឹកនាំ សមាជិក សមាជិកាព្រឹទ្ធសភាក្នុងការបំពេញមុខងារ។
ជាចុងក្រោយ ឯកឧត្តមអនុប្រធានទី១ ព្រឹទ្ធសភា ក៏បានផ្តាំផ្ញើដល់ថ្នាក់ដឹកនាំ និងមន្រ្តី នៃអគ្គលេខាធិការដ្ឋាន ព្រឹទ្ធសភាទាំងអស់ សូមបន្តការខិតខំបំពេញការងារ គោរពច្បាប់លក្ខន្តិកៈ បទបញ្ជាផ្ទៃក្នុង វិន័យ និង
ក្រមសីលធម៌មន្ត្រីរាជការនៃអគ្គលេខាធិការដ្ឋានព្រឹទ្ធសភា ព្រមទាំងជំរុញសាមគ្គីភាព និងកិច្ចសហការល្អក្នុងការងារ សំដៅរួមចំណែកក្នុងការផ្តល់សេវាជូនថ្នាក់ដឹកនាំ និងសមាជិក-សមាជិការព្រឹទ្ធសភាឱ្យបានគ្រប់ជ្រុងជ្រោយ ប្រកបដោយគុណភាព ប្រសិទ្ធភាព និងគណនេយ្យភាព៕

ខ្លឹមសារ៖ ខុទ្ទកាល័យឯកឧត្តមអនុប្រធានទី១ព្រឹទ្ធសភា
រូបភាព៖ នាយកដ្ឋានព័ត៌មាន