នាព្រឹកថ្ងៃសុក្រ ៣រោច ខែផល្គុន ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី៦ ខែមីនា ឆ្នាំ២០២៦ សាស្រ្តាចារ្យ និងនិស្សិតនៃសកលវិទ្យាល័យអាមេរិកកាំងភ្នំពេញចំនួន៨០នាក់ បានអញ្ជើញទស្សនកិច្ចសិក្សាស្វែងយល់អំពីស្ថាប័នព្រឹទ្ធសភានៃព្រះរាជាណាចក្រកម្ពុជា នៅវិមានព្រឹទ្ធសភា។
ក្នុងឱកាសមកទស្សនកិច្ចនោះ សាស្ត្រាចារ្យ និងនិស្សិត បានអញ្ជើញស្តាប់នូវការធ្វើបទបង្ហាញរបស់ឯកឧត្តម យស ផានីត្តា ប្រធានគណៈកម្មការទី២ ព្រឹទ្ធសភា ស្តីពី សាវតានៃការបង្កើតស្ថាប័នព្រឹទ្ធសភា រចនាសម្ព័ន្ធគ្រប់គ្រង និងដឹកនាំ តួនាទី និងភារកិច្ចរបស់ព្រឹទ្ធសភា ព្រមទាំងអាទិភាពការងារសំខាន់ៗទាំង២ របស់ព្រឹទ្ធសភានីតិកាលទី៥ ក្រោមការដឹកនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា។
ជាមួយគ្នានោះ ក៏មានការធ្វើបទបង្ហាញពីលោក សុខ សុជាតិ ប្រធានក្រុមស្រាវជ្រាវទូទៅនៃអគ្គនាយកដ្ឋានស្រាវជ្រាវទូទៅ ស្តីពីដំណើរការងារនីតិកម្មរបស់ព្រឹទ្ធសភានៃព្រះរាជាណាចក្រកម្ពុជា និងបទបង្ហាញលោកស្រី ឃុន សុវណ្ណនេត្រា ប្រធាននាយកដ្ឋានអភិវឌ្ឍន៍ធនធានមនុស្ស ស្តីពីរចនាសម្ព័ន តួនាទី និងភារកិច្ចរបស់អគ្គលេខាធិការដ្ឋានព្រឹទ្ធសភា នៅសាលសិក្ខាសាលាខាងជើង វិមានព្រឹទ្ធសភា។
បន្ទាប់ពីបានស្តាប់នូវបទបង្ហាញរួចមក សាស្ត្រាចារ្យ និងនិស្សិត បានអញ្ជើញទស្សនាសាលប្រជុំពេញអង្គព្រឹទ្ធសភា និងអគារប្រវត្តិសាស្រ្តនានា នៅក្នុងបរិវេណព្រឹទ្ធសភា ព្រមទាំងថតរូបអនុស្សាវរីយ៍…។
ប្រភព៖ នាយកដ្ឋានព័ត៌មាន
