នាព្រឹកថ្ងៃទី២៨ ខែមីនា ឆ្នាំ២០២៦ ឯកឧត្តម ស្លេះ ពុនយ៉ាមុីន សមាជិកក្រុមសមាជិកព្រឹទ្ធសភាប្រចាំភូមិភាគទី២ បានអញ្ជើញជាអធិបតីក្នុងពិធីប្រគល់បណ្ណសរសើរ និងសញ្ញាបត្រជូនដល់សិស្សានុសិស្សដែលបានបញ្ចប់ការសិក្សាផ្នែកអាលីម នៃសាលាអាល់រ៉ហម៉ាស់ ស្ថិតនៅភូមិពង្រ ឃុំរកាគយ ស្រុកកងមាស ខេត្តកំពង់ចាម។
ក្នុងពិធីនេះដែរក៏មានការអញ្ជើញចូលរួមពីសំណាក់ ឯកឧត្តមសមាជិកក្រុមប្រឹក្សាខេត្ត អភិបាលរងខេត្ត ក្រុង/ស្រុក គណៈអុីមាំខេត្ត/ស្រុក លោកគ្រូ អ្នកគ្រូ ហាកឹម មេឃុំ/ភូមិ និងបងប្អូនប្រជាពលរដ្ឋជាច្រើននាក់ផងដែរ។
នាឱកាសចាប់ផ្តើម ឯកឧត្តមសមាជិកព្រឹទ្ធសភា បានពាំនាំនូវការផ្តាំផ្ញើ សាកសួរសុខទុក្ខពីសំណាក់ឯកឧត្តម អ៊ុច បូររិទ្ធ អនុប្រធានទី១ព្រឹទ្ធសភា ជូនដល់លោកគ្រូ សិស្សានុសិស្ស និងបងប្អូនដែលបានចូលរួមក្នុងពិធីទាំងមូល។ ឯកឧត្តម សមាជិកព្រឹទ្ធសភា ក៏បានសម្តែងការកោតសរសើរថ្នាក់ដឹកនាំលោកគ្រូ នៃសាលាអាល់រ៉ហម៉ាស ទាំងអស់ដែលបានចំណាយពេលវេលាកម្លាំងកាយចិត្ត និងប្រាជ្ញាស្មារតីចូលរួមចំណែកកសាង និងអភិវឌ្ឍន៍ធនធានមនុស្ស ជាពិសេសក្នុងវិស័យអប់រំអ៉ិស្លាម។ ទន្ទឹមនឹងនេះ ឯកឧត្តមបានចូលរួមអបអរសាទរដល់សិស្សានុសិស្សទាំងអស់ ដែលបញ្ចប់ការសិក្សាដោយជោគជ័យ និងបន្តឱ្យប្អូនៗខិតខំព្យាយាមរៀនសូត្រឱ្យបានពូកែ ធ្វើយ៉ាងណាឱ្យក្លាយទៅជាបុគ្គលដែលមានសមត្ថភាព ដើម្បីយកចំណេះដឹងដែលមានគុណធម៌ មកបម្រើជាប្រយោជន៍ដល់សង្គមជាតិ ក៏ដូចជាភាពរីកចម្រើន ដល់ក្រុមគ្រួសារ ទន្ទឹមនោះ នៅពេលដែលប្អូនៗ មានចំណេះដឹងហើយ សូមវិលត្រឡប់ មកវិញ ដើម្បីរួមគ្នាកសាងអភិវឌ្ឍន៍ សហគមន៍របស់យើង ឱ្យកាន់តែមានការរីកចម្រើនតទៅមុខទៀត។
ក្នុងឱកាសនោះផងដែរ ឯកឧត្តមសមាជិកព្រឹទ្ធសភាបានថ្លែងអំណរគុណដល់បងប្អូនប្រជាពលរដ្ឋទាំងអស់ ដែលតែងតែគាំទ្រចំពោះរាជរដ្ឋាភិបាល ក្រោមការដឹកនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី ប្រធានព្រឹទ្ធសភាបច្ចុប្បន្ន និងបន្តមកសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលតែងតែយកចិត្តទុកដាក់ និងផ្តល់កិច្ចគាំពារទាំងឡាយ ដល់ប្រជាពលរដ្ឋទូទៅ ដោយគ្មានការរើសអើងនោះទេ ជាពិសេសផ្តល់ឱកាស និងសិទ្ធសេរីភាពគ្រប់សព្វបែបយ៉ាង ដល់សហគមន៍អ៉ិស្លាមកម្ពុជា។ ដូច្នេះហើយ យើងទាំងអស់ត្រូវប្តេជ្ញាដាច់ខាតក្នុងការការពារសន្តិភាព និងអភិវឌ្ឍន៍ប្រទេសយើងឱ្យកាន់តែមានភាពរីកចម្រើនជានិច្ច។
ក្រោយបញ្ចប់កម្មវិធី ក្នុងនាមឯកឧត្តម អ៊ុច បូររិទ្ធ ឯកឧត្តម ស្លេះ ពុនយ៉ាមុីន បាននាំយកថវិកាឧបត្ថម្ភចំនួន១,០០០,០០០៛(មួយលានរៀល) សម្រាប់រៀបចំកម្មវិធីផងដែរ៕
ប្រភព៖ ជំនួយការឯកឧត្ដម ស្លេះ ពុនយ៉ាមុីន
