នាព្រឹកថ្ងៃទី២០ ខែកុម្ភៈ ឆ្នាំ២០២៦ នៅវិមានរដ្ឋសភា ឯកឧត្តម យស ផានីតា្ត ប្រធានគណៈកម្មការទី២ព្រឹទ្ធសភា និងលោកជំទាវ មុំ សណ្តាប់ សមាជិកគណៈកម្មការទី៦ព្រឹទ្ធសភា បានអញ្ជើញចូលរួមកិច្ចប្រជុំត្រៀម ដើម្បីរៀបចំវេទិកាសមាជិកសភាអាស៊ី–ប៉ាស៊ីហ្វិក ស្តីពីសុខភាពសកលលើកទី៩ (9th APPF-GH)។ កិច្ចប្រជុំនេះដឹកនាំដោយ ឯកឧត្តម យស ផានីតា្ត និង ឯកឧត្តម សេង ញ៉ក់ សមាជិកគណៈកម្មការទី៨រដ្ឋសភា ដោយមានការចូលរួមពីតំណាងស្ថាប័នពាក់ព័ន្ធ រួមទាំង World Health Organization (WHO) ផងដែរ។
កិច្ចប្រជុំបានផ្តោតសំខាន់លើការបញ្ជាក់របៀបវារៈ ប្រធានបទស្នូល និងផែនការរៀបចំទូទៅ។ ភាគីពាក់ព័ន្ធបានឯកភាពយក “ការធានារ៉ាប់រងសុខភាពជាសកល (Universal Health Coverage – UHC)” ជាប្រធានបទស្នូល ស្របតាមអាទិភាពរបស់រាជរដ្ឋាភិបាលកម្ពុជា។ ក្រោមប្រធានបទនេះ នឹងរួមបញ្ចូលប្រធានបទរងដូចជា ការពង្រឹងប្រព័ន្ធសុខាភិបាល ជំងឺមិនឆ្លង សុខភាពផ្លូវចិត្ត សុខភាពឌីជីថល និងបញ្ញាសិប្បនិម្មិតក្នុងវិស័យសុខាភិបាល។
វេទិកានេះ គ្រោងនឹងធ្វើឡើងនៅក្នុងខែសីហា ឆ្នាំ២០២៦ ខេត្តកំពត។ កិច្ចប្រជុំក៏បានពិភាក្សាអំពីរយៈពេលរៀបចំវេទិកា ពាក់ព័ន្ធនឹងកម្មវិធីទស្សនកិច្ចសិក្សា និងការរៀបចំភស្តុភារ ដើម្បីធានាឱ្យការអនុវត្តកម្មវិធីប្រព្រឹត្តទៅដោយរលូន និងមានប្រសិទ្ធភាព។
តាមការឯកភាព World Health Organization (WHO) នឹងទទួលខុសត្រូវលើការរៀបចំទីកន្លែងស្នាក់នៅសម្រាប់ភ្ញៀវចូលរួមមកពីចំនួន ១៣ ប្រទេស រួមទាំងព្រះរាជាណាចក្រកម្ពុជា សម្រាប់រយៈពេល ៣ យប់។
បន្ថែមពីនេះ កិច្ចប្រជុំបានពិភាក្សាអំពីការរៀបចំផែនការពេលវេលា (Timeline) និងចំណុចសំខាន់ៗ (Key Milestones) សម្រាប់ការត្រៀមរៀបចំវេទិកា។ ឯកសារសំខាន់ៗ រួមមាន របៀបវារៈបឋម ព័ត៌មានទូទៅ និង Concept Note ត្រូវរៀបចំឱ្យរួចរាល់មុនថ្ងៃទី២៦ ខែមេសា ដើម្បីបន្តពិភាក្សាបន្ថែម និងចែកចាយលិខិតអញ្ជើញជាផ្លូវការ។

ប្រភព៖ នាយកដ្ឋានទំនាក់ទំនងអន្តរជាតិ