គណៈប្រតិភូគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃព្រឹទ្ធសភា (គណៈកម្មការទី៨) និងក្រុមសមាជិកាព្រឹទ្ធសភា ដឹកនាំដោយលោកជំទាវ មាន សំអាន ប្រធានគណៈកម្មការ និងជាប្រធានក្រុម បានអញ្ជើញចុះសួរសុខទុក្ខ លោកគ្រូ អ្នកគ្រូស្ម័គ្រចិត្ត និងកុមារ ព្រមទាំងនាំយកអំណោយជូនសមាគមស្នាមញញឹមថ្មីនៃក្ដីសង្ឃឹមរបស់កុមារ នៅស្រុកកណ្តាលស្ទឹង ខេត្តកណ្តាល នាព្រឹកថ្ងៃសុក្រ ៨រោច ខែចេត្រ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១០ ខែមេសា ឆ្នាំ២០២៦។
លោកជំទាវប្រធាន បាននាំយកនូវប្រសាសន៍ផ្ដាំផ្ញើសួរសុខទុក្ខប្រកបដោយការយកចិត្តទុកដាក់ខ្ពស់បំផុតរបស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងថ្នាក់ដឹកនាំព្រឹទ្ធសភា និងថ្លែងកោតសរសើរចំពោះសមាគមដែលខិតខំប្រឹងប្រែង និងអភិវឌ្ឍន៍ឱ្យមានការរីកចម្រើនជាលំដាប់ ជាពិសេសផ្តល់ការថែទាំ អាហារ ការស្នាក់នៅ និងបញ្ជូនកុមារទៅសាលារៀនយ៉ាងទៀងទាត់ បង្ហាត់បង្រៀនកុមារមានទម្លាប់រស់នៅល្អ មានវិន័យ និងសុជីវធម៌ ព្រមទាំងស្វះស្វែងចូលរួមក្នុងកិច្ចការសង្គមផ្សេងៗ។
លោកជំទាវប្រធាន បានបន្តថា កុមារគឺជាទំពាំងស្នងឫស្សីដែលចាំបាច់ត្រូវយកចិត្តទុកដាក់មើលថែទាំឱ្យបានល្អដ្បិតពួកគាត់គួរអាណិតណាស់ដែលគ្មានអាណាព្យាបាលមើលថែ ប៉ុន្តែជាបុណ្យកុសលល្អដែលមានសមាគមបានយកមកចិញ្ចឹមបីបាច់ថែរក្សា ផ្គត់ផ្គង់ការរៀនសូត្រ ផ្តល់ចំណីអាហារ កន្លែងស្នាក់នៅជាដើម ដែលសបញ្ជាក់នូវការរួមចំណែកជួយសង្គមយើងទាំងអស់គ្នា តាមរូបភាពផ្សេងៗក្នុងទិសដៅរក្សាសន្តិភាព និងការអភិវឌ្ឍជាតិឱ្យរីកចម្រើនទៅមុខជាលំដាប់។
លោកជំទាវប្រធាន បានណែនាំដល់ក្មួយៗ ចៅៗកុមារទាំងអស់ ត្រូវចេះថែទាំសុខភាពឱ្យបានល្អ ទម្លាប់ហូបស្អាត និងផឹកទឹកដាំឆ្អិន ហើយត្រូវចេះស្រឡាញ់ សាមគ្គីគ្នា ជួយគ្នាទៅវិញទៅមក និងត្រូវចៀសឱ្យឆ្ងាយពីការសេពគប់មិត្តមិនល្អ ឬការប្រើប្រាស់គ្រឿងញៀន ហើយត្រូវខិតខំសិក្សារៀនសូត្រ ឱ្យពូកែ ដើម្បីអនាគតរុងរឿង ក្លាយជាពលរដ្ឋល្អ និងជាធនធានមនុស្សដ៏ឆ្នើមរបស់សង្គមជាតិ។
អំណោយដែលគណៈកម្មការទី៨ព្រឹទ្ធសភា និងក្រុមសមាជិកាព្រឹទ្ធសភា បានផ្តល់ជូនសម្រាប់សម្រាលជីវភាពរស់នៅប្រចាំថ្ងៃរបស់មណ្ឌលនៅពេលនេះរួមមាន៖ ១-ទឹកបរិសុទ្ធ ចំនួន៣០កេស ២-ទឹកក្រូច ចំនួន៥កេស ៣-ទឹកផ្លែឈើ ចំនួន៥កេស ៤-ផ្លែក្រូចក្រហម ចំនួន១០កស ៥-ផ្លែសារី ចំនួន៤កេស ៦-ថវិកាឧបត្តម្ភមណ្ឌលចំនួន១លានរៀល ៧-ថវិកាឧបត្ថម្ភកុមារក្នុងមណ្ឌល សរុបចំនួន ១៣៥នាក់ ក្នុង១នាក់ចំនួន១ម៉ឺនរៀល។
ប្រភព៖ នាយកដ្ឋានព័ត៌មាន
