ថ្ងៃពុធ ៥កើត ខែបឋមាសាឍ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី១៤ ខែមិថុនា ឆ្នាំ២០២១ ឯកឧត្តម ម៉ុម ជឹមហ៊ុយ ប្រធានគណៈកម្មការទី៧ ព្រឹទ្ធសភា និងជាអនុប្រធានក្រុមសមាជិកព្រឹទ្ធសភា ប្រចាំភូមិភាគទី១ បានអញ្ជើញចុះជួបសំណេះសំ ណាល និងសួរសុខទុក្ខក្រុមប្រឹក្សាសង្កាត់ស្នោ ខណ្ឌកំបូល រាជធានីភ្នំពេញ ដើម្បីស្វែងយល់អំពីវឌ្ឍនភាពការងារ និងស្ថានភាពរស់នៅរបស់ប្រជាពលរដ្ឋក្នុងមូលដ្ឋាន។ បន្ទាប់ពីស្តាប់របាយការណ៍រួចមក ឯកឧត្តមប្រធាន បានសម្តែងការកោតសរសើរ លើកទឹកចិត្តដល់អាជ្ញាធរ ដែលខិតខំបំពេញការងារបានយ៉ាងល្អ និងដោះស្រាយការលំបាករបស់ប្រជាពលរដ្ឋទាន់ពេលវេលា ព្រមទាំងបានផ្តល់អនុសាសាន៍គន្លឹះមួយចំនួនដូចជា ៖
១-បន្តអនុវត្តន៍តាមការណែនាំរបស់រាជរដ្ឋាភិបាល និងក្រសួងសុខាភិបាល ក្នុងការបង្ការ និងទប់ស្កាត់ការរីករាលដាលជំងឺកូវីដ-១៩
២-ត្រូវខិតខំប្រមូលកម្លាំងរួម មធ្បោបាយរួម ដើម្បីប្រយុទ្ធប្រឆាំងនឹងការរាតត្បាតជំងឺកូវីដ-១៩
៣-បន្តអប់រំប្រជាពលរដ្ឋឱ្យផ្លាស់ប្តូរឥរិយាបថក្នុងការរស់នៅតាមបរិបទថ្មី ដោយ រស់នៅតាមបែបគន្លងថ្មី
៤-បន្តអនុវត្តគោលនយោបាយភូមិ សង្កាត់មានសុវត្ថិភាព ឱ្យមានប្រសិទ្ធភាពខ្ពស់ ការផ្តល់សេវាសាធារណជូនប្រជាពលរដ្ឋទាន់ពេលវេលា។ មុននឹងបញ្ជប់ ឯកឧត្តមប្រធាន បានឧបត្ថម្ភនូវថវិកាមួយចំនួន ដើម្បីផ្តល់ជាកម្លាំងចិត្តឱ្យបន្តការខិតខំទៅមុខទៀត។
