នាព្រឹកថ្ងៃទី២២ ខែមេសា ឆ្នាំ២០២២ គណៈកម្មការផែនការ វិនិយោគ កសិកម្ម ធនធានទឹក ឧតុនិយម អភិវឌ្ឍន៍ជនបទ និងបរិស្ថាន នៃព្រឹទ្ធសភា (គណៈកម្មការទី៣) ដឹកនាំដោយឯកឧត្តមបណ្ឌិត ម៉ុង ប្ញទ្ធី ប្រធានគណៈកម្មការ បានអញ្ជើញជួបពិភាក្សាការងារជាមួយនឹងអាជ្ញាធរខេត្តកំពង់ស្ពឺ មន្ទីរជំនាញពាក់ព័ន្ធ ក្រុមប្រឹក្សាឃុំ សង្កាត់ និងប្រធានសហគមន៍កសិកម្ម ដឹកនាំដោយឯកឧត្តម វ៉ី សំណាង អភិបាល នៃគណៈអភិបាលខេត្តកំពង់ស្ពឺ ដើម្បីឈ្វេងយល់ និងសម្រង់ព័ត៌មានពាក់ព័ន្ធនឹងវិស័យជាសមត្ថកិច្ចរបស់គណៈកម្មការ បញ្ហាប្រឈម និងសំណូមពរនានា នៅសាលប្រជុំសាលាខេត្តកំពង់ស្ពឺ។ ជំនួបពិភាក្សានេះ ធ្វើឡើងក្នុងគោលបំណងឈ្វេងយល់ និងសម្រង់ព័ត៌មានពាក់ព័ន្ធនឹងវិស័យជាសមត្ថកិច្ចរបស់គណៈកម្មការ មានដូចជា៖ ១-ការអនុវត្តគោលនយោបាយរបស់រាជរដ្ឋាភិបាល និងវឌ្ឍនភាពការងាររបស់ខេត្ត។ ២-បញ្ហាប្រឈមនិងសំណូមពររបស់ឃុំ សង្កាត់ ពាក់ព័ន្ធនឹងវិស័យ ជាសមត្ថកសិកម្ម ធនធានទឹក អភិវឌ្ឍន៍ជនបទ បរិស្ថាន និងការ វិនិយោគ។ ៣-ការងារ និងលទ្ធផលតាមវិស័យដែលពាក់ព័ន្ធទៅនឹងសមត្ថកិច្ចរបស់គណៈកម្មការ ដូចជា ផែនការ វិនិយោគ កសិកម្ម ធនធានទឹក អភិវឌ្ឍន៍ជនបទ និងបរិស្ថាន ។ ៤-ការផ្សព្វផ្សាយច្បាប់និងលិខិតបទដ្ឋានគតិយុត្ត ដែលពាក់ព័ន្ធ ទៅនឹងការពង្រឹងវិស័យនីតិរដ្ឋនៅកម្ពុជា។ ៥-ឈ្វេងយល់អំពី ប្រតិបត្តិការវិស័យឯកជន និងបញ្ហាប្រឈម។ ៦-ឈ្វេងយល់អំពី ការគ្រប់គ្រងនិងចលនាសហគមន៍កសិកម្ម។
ប្រភព៖ នាយកដ្ឋានព័ត៌មាន
