គណៈប្រតិភូគណៈកម្មការសិទ្ធិមនុស្ស ទទួលពាក្យបណ្តឹង និងអង្កេតនៃព្រឹទ្ធសភា (ហៅកាត់គណៈកម្មការទី១) ដឹកនាំដោយឯកឧត្តម យ៉ង់ សែម ប្រធានគណៈកម្មការ បានអញ្ជើញជួបសំណេះសំណាលជាមួយនឹងអាជ្ញាធរស្រុក ក្រុមប្រឹក្សាឃុំចំនួន៣នៃស្រុកមណ្ឌលសីមា ខេត្តកោះកុង ដោយមានការចូលរួមពីប្រធានក្រុមប្រឹក្សាខេត្ត អភិបាលរងខេត្ត និងនាយរងរដ្ឋបាលសាលាខេត្តកោះកុង សរុប១១០នាក់ នាព្រឹកថ្ងៃទី០៥ ខែឧសភា ឆ្នាំ២០២២ នៅសាលមហោស្រពខេត្តកោះកុង ដែលស្ថិតនៅក្នុងក្រុងខេមរភូមិន្ទ ខេត្តកុងកោះ។ ពិធីសំណេះសំណាលនេះរៀបចំឡើង ដើម្បីឈ្វេងយល់ និងប្រមូលព័ត៌មាន ពាក់ព័ន្ធនឹងការអនុវត្តការងារ និងបញ្ហាប្រឈមនានារបស់ស្រុក ឃុំ។ ឯកឧត្តមប្រធានក៏បាន ជំរុញ និងកើនរំលឹកដល់ក្រុមប្រឹក្សាឃុំឱ្យត្រៀមខ្លួនសម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ នាពេលខាងមុខនេះ អាជ្ញាធរពាក់ព័ន្ធ និងក្រុមប្រឹក្សាឃុំ ត្រូវបន្តយកចិត្តទុកដាក់អនុវត្តការងារទៅតាមតួនាទីភារកិច្ច ឱ្យកាន់តែសកម្ម យកចិត្តទុកដាក់លើការងាររក្សាការពារសុខសុវត្ថិភាព ជូនប្រជាពលរដ្ឋក្នុងឃុំ ស្រុក ព្រមទាំងបន្តចូលរួមសាមគ្គីភាពផ្ទៃក្នុង ប្រមូលផ្តុំកម្លាំង វិធានការ និងមធ្យោបាយសរុប៕
ប្រភព៖នាយកដ្ឋានព័ត៌មាន
