នាព្រឹកថ្ងៃទី២២ ខែកញ្ញា ឆ្នាំ២០២២ អគ្គលេខាធិការដ្ឋានព្រឹទ្ធសភា សហការជាមួយមជ្ឈមណ្ឌលជាតិផ្ដល់ឈាម បានរៀបចំកម្មវិធីបរិច្ចាគឈាម ដើម្បីជួយសង្គ្រោះជីវិតមនុស្ស ក្រោមប្រធានបទ៖ ខ្ញុំ និងអ្នក យើងទាំងអស់គ្នា រួមគ្នាលើកកម្ពស់វប្បធម៌ផ្តល់ឈាមសង្រ្គោះជីវិត នៅវិមានព្រឹទ្ធសភា។ ពិធីនេះប្រព្រឹត្តទៅក្រោមអធិបតីភាពឯកឧត្តម អ៊ុ សារឹទ្ធ អគ្គលេខាធិការព្រឹទ្ធសភា និងលោកវេជ្ជបណ្ឌិត លី សុវិទ្យ អនុប្រធានមជ្ឈមណ្ឌលជាតិផ្តល់ឈាម ដោយមានការអញ្ជើញចូលរួមថ្នាក់ដឹកនាំ មន្ត្រីរាជការ នៃអគ្គលេខាធិការដ្ឋានព្រឹទ្ធសភា បុគ្គលិកវិមាន ៧មករា និងយុវជនស.ស.យ.ក ខណ្ឌជ្រោយចង្វារ ដែលជាអ្នកស្ម័គ្រចិត្តបរិច្ចាគឈាម។ ពិធីនេះរៀបចំឡើងក្នុងគោលបំណងដើម្បីបំផុសសកម្មភាព មនុស្សធម៌ និងចូលរួមដោះស្រាយបញ្ហាខ្វះឈាមសម្រាប់សង្គ្រោះជីវិតជាមនុស្សច្រើននៅកម្ពុជា។ សកម្មភាពមនុស្សធម៌នេះ គឺដើម្បីជួយកាត់បន្ថយបញ្ហាប្រឈមនានា និងការខ្វះខាតឈាមដែលមជ្ឈមណ្ឌលជាតិផ្តល់ឈាម កំពុងតែជួបប្រទះ ក៏ដូចជាបំផុសការយល់ដឹងដល់អ្នកផ្សេងឲ្យចូលរួមបរិច្ចាគឈាម ក្នុងដំណាក់កាលដ៏លំបាកនេះដើម្បីធានាឱ្យមាន ការផ្គត់ផ្គង់ឈាមដល់អ្នកជំងឺដែលកំពុងត្រូវការឈាមនៅគ្រប់មន្ទីរពេទ្យទាំងអស់ដោយមិនរើសអើង និងមិនប្រកាន់ពូជសាសន៍នៃសាសនាអ្វីឡើយ៕ ប្រភព៖នាយកដ្ឋានព័ត៌មាន
