នាព្រឹកថ្ងៃទី០៣ ខែតុលា ឆ្នាំ២០២២ អគ្គលេខាធិការដ្ឋានព្រឹទ្ធសភាបានរៀបចំពិធីសំណេះសំណាលជាមួយនឹងនិវត្តជន និងមន្ត្រីរាជការវ័យចំណាស់នៃអគ្គលេខាធិការដ្ឋានព្រឹទ្ធសភា ក្រោមប្រធានបទ ទិវាមនុស្សចាស់កម្ពុជា និងទិវាមនុស្សចាស់អន្តរជាតិលើកទី២៤ ១ តុលា ឆ្នាំ២០២២ ត្រូវបានកំណត់ថា មនុស្សវ័យចាស់ជារតកដ៏សំខាន់ ក្នុងការអភិវឌ្ឍគ្រួសារ និងសង្គម នៅសាលសិក្ខាសាលាបណ្ណាល័យព្រឹទ្ធសភា។ ពិធីនេះប្រព្រឹត្តទៅក្រោមអធិបតីភាពឯកឧត្តម ឡោក ឆាយ អគ្គលេខាធិការស្តីទីព្រឹទ្ធសភា ដោយមានការអញ្ជើញពីនិវត្តជន និងមន្ត្រីរាជការវ័យចំណាស់ និងថ្នាក់ដឹកនាំអង្គភាពចំណុះអគ្គលេខាធិការដ្ឋានព្រឹទ្ធសភាសរុបចំនួន១២០នាក់។ អង្គពិធីដំណើរការដោយមានការបញ្ចាំងវីដេអូស្តីពីសកម្មភាពសួរសុខទុក្ខនិវត្តជន មន្ត្រីរាជការលំហែមាតុភាព មានជំងឺ និងជួបហានិភ័យផ្សេងៗ ព្រមទាំងចំណាប់អារម្មណ៍តំណាងនិវត្តជនដោយលោក ចេង ប៊ុណ្ណា និវត្តជន និងចំណាប់អារម្មណ៍តំណាងមន្ត្រីរាជការវ័យចំណាស់ដោយលោក ប៉ាវ ភីរុណ ប្រធានអង្គភាពកិច្ចការសង្គម និងមតិសំណេះសំណាងរបស់ឯកឧត្តម ឡោក ឆាយ អគ្គលេខាធិការស្តីទីព្រឹទ្ធសភាផងដែរ។
ប្រភព៖នាយកដ្ឋានព័ត៌មាន
