សមាជិកក្រុមសមាជិកព្រឹទ្ធសភា ប្រចាំភូមិភាគទី៤ បានអញ្ជើញចុះទៅជួបសំណេះសំណាលជាមួយប្រជាពលរដ្ឋ ចំនួន១៣គ្រួសារ ក្នុងសង្កាត់ជ្រាវ ក្រុងសៀមរាប ខេត្តសៀមរាប
នៅថ្ងៃច័ន្ទ ទី២០ ខែមីនា ឆ្នាំ២០២៣ ឯកឧត្តម ឡៅ ឆន សមាជិកគណៈកម្មការទី៧ព្រឹទ្ធសភា និងជាសមាជិកក្រុមសមាជិកព្រឹទ្ធសភា ប្រចាំភូមិភាគទី៤ និងលោកជំទាវ បានអញ្ជើញចុះទៅជួបសំណេះសំណាលជាមួយប្រជាពលរដ្ឋ ចំនួន១៣គ្រួសារ ដែលកំពុងធ្វើស្រែប្រាំងនៅកន្លែងទីតាំងដីទំនប់រាំងទេ ស្ថិតក្នុងសង្កាត់ជ្រាវ ក្រុងសៀមរាប ខេត្តសៀមរាប។ ថ្លែងក្នុងឱកាសនោះ ឯកឧត្តម ពិនិត្យឃើញថាផលស្រូវប្រាំងឆ្នាំនេះនឹងទទួលបានផលពី៣ ទៅ៤តោនក្នុង១ហិតា នេះបើតាមការលើកឡើងរបស់ពួកគាត់។ ពិសេសឃើញបងប្អូនយើងសប្បាយចិត្តណាស់ដែល សម្តេចអគ្គមហាសេនាបតីតេជោ ហ៊ុន សែន ប្រមុខរាជរដ្ឋាភិបាល ដែលបានប្រគល់ដីស្រែប្រាំង ក្នុងទីតាំងនេះឱ្យទៅពួកគាត់បានធ្វើវិញ សូមថ្លែងអំណរគុណចំពោះសម្តេច និងសូមគាំទ្រសម្តេច ជានាយករដ្ឋមន្ត្រីរៀងរហូតគ្រប់អាណត្តិ និងគាំទ្របេក្ខភាពឯកឧត្តម ហ៊ុន មាណែត ជាបេក្ខជននាយករដ្ឋមន្ត្រីបន្តវេននៅពេលអនាគត។ ក្នុងពេលនោះឯកឧត្តម ក៏បានឧបត្តម្ភភេសជ្ជៈ ចំនួន៣កេះ និងទឹកសុទ្ធ ចំនួន២កេះ ផងដែរ។
