នារសៀលថ្ងៃទី០៧ ខែឧសភា ឆ្នាំ២០២៣ ឯកឧត្តម ម៉ម ប៊ុននាង ប្រធានគណៈកម្មការទី១០ និងជាអ្នកនាំពាក្យព្រឹទ្ធសភា បានអញ្ជើញនាំយកអំណោយសួរសុខទុក្ខលោកស្រី ចេក គឹមអ៊ាង ប្រធានអង្គការបក្សីខៀវថែទាំសុខុមាលភាពប្រជាពលរដ្ឋ ស្ថិតនៅភូមិថ្ម ឃុំគ្រើល ស្រុកប្រសាទបល្ល័ង ខេត្តកំពង់ធំ ដែលទើបនឹងលំហែរមាតុភាព។

អង្គការបក្សីខៀវថែទាំសុខុមាលភាពប្រជាពលរដ្ឋ ជាសាខារបស់អង្គការចែករំលែកសង្គ្រោះជីវិតសកល (Global Life Sharing) នៃសាធារណរដ្ឋកូរ៉េ ដែលជាដៃគូហត្ថលេខីឧបត្ថម្ភអំណោយមនុស្សធម៌ជូនដល់ព្រឹទ្ធសភា នៃព្រះរាជាណាចក្រកម្ពុជា នាពេលកន្លងមកដែលរួមមាន៖ បរិក្ខាពេទ្យ ថ្នាំពេទ្យ សំលៀកបំពាក់ គ្រឿងសម្អាង និងសម្ភារៈមួយចំនួន បានចំនួន ៤ដងរួចមកហើយ ដែលសរុបជាថវិកាប្រមាណជា ៥,០០០,០០០$ (ប្រាំលានដុល្លារអាមេរិក)។

អំណោយទាំងអស់ ត្រូវបានគ្រប់គ្រងនិងណែនាំដ៏ខ្ពង់ខ្ពស់ពីសំណាក់ សម្តេចប្រធានព្រឹទ្ធសភា និងតាមរយៈ ឯកឧត្តម ម៉ម ប៊ុននាង អំណោយត្រូវបានប្រគល់ជូនមន្ទីររដ្ឋ មន្ទីរសុខាភិបាលខេត្ត មណ្ឌលសុខភាព ពិសេសជូនដល់ប្រជាពលរដ្ឋទ័លក្រ ដើម្បីលើកកម្ពស់សុខុមាលភាព និងគុណភាពជីវិតឲ្យកាន់តែប្រសើរឡើង។