គណៈកម្មការទី៣ព្រឹទ្ធសភា បានបើកកិច្ចប្រជុំផ្ទៃក្នុង ក្រោមអធិបតីភាពដ៏ខ្ពង់ខ្ពស់ របស់ ឯកឧត្តមបណ្ឌិត ម៉ុង ប្ញទ្ធី ប្រធានគណៈកម្មការ
នៅសាលប្រជុំគណៈកម្មការទី៣ អគារ F វិមានព្រឹទ្ធសភា នាថ្ងៃចន្ទ ទី៥ ខែមិថុនា ឆ្នាំ២០២៣ វេលាម៉ោង ៨ ព្រឹក គណៈកម្មការផែនការ វិនិយោគ កសិកម្ម ធនធានទឹក ឧតុនិយម អភិវឌ្ឍន៍ជនបទ និងបរិស្ថាននៃព្រឹទ្ធសភា(គណៈកម្មការទី៣) បានបើកកិច្ចប្រជុំផ្ទៃក្នុង ដើម្បីពិនិត្យនិងពិភាក្សាលើសេចក្តីព្រាងក្រមបរិស្ថាននិងធនធានធម្មជាតិ ក្រោមអធិបតីភាពដ៏ខ្ពង់ខ្ពស់របស់ ឯកឧត្តមបណ្ឌិត ម៉ុង ប្ញទ្ធី ប្រធានគណៈកម្មការ ។
ក្រោយពីបានពិនិត្យនិងពិភាក្សាយ៉ាងល្អិតល្អន់លើខ្លឹមសាររួមនៃសេចក្តីព្រាងក្រមនេះរួចមក ជាលទ្ធផល គណៈកម្មការបានអនុម័តយល់ព្រមចំនួន៥សំឡេងនៃចំនួនសមាជិកគណៈកម្មការទាំងមូល ទទួលយកសេចក្ដីព្រាងក្រមនេះទាំងស្រុងដោយឥតកែប្រែ ដើម្បីលើកយកទៅពិនិត្យនិងពិភាក្សាជាមួយតំណាងរាជរដ្ឋាភិបាល។
