ស្ថិតនៅក្រុងសិរីសោភ័ណ ខេត្តបន្ទាយមានជ័យ នាព្រឹកថ្ងៃទី៧ ខែមេសា ឆ្នាំ២០២៤ សាលារៀន ផីឆឹង មានរៀបចំពិធីប្រគល់វិញ្ញាបនបត្រ និងបណ្ណសរសើរ ជូនដល់សិស្សានុសិស្ស និងបុគ្គលិកសិក្សា ក្រោមអធិបតីភាព ឯកឧត្តម ឈើយ ចាន់ណា លេខាធិការគណៈកម្មការទី៧ ព្រឹទ្ធសភា និងជាឧត្តមទីប្រឹក្សាសមាគមខ្មែរ-ចិន ខេត្តបន្ទាយមានជ័យ រួមជាមួយ ឯកឧត្តម អេង ប៊ុនឆាយ សមាជិកក្រុមប្រឹក្សាខេត្ត និងជាឧត្ដមទីប្រឹក្សាសមាគមខ្មែរ-ចិនខេត្ត លោក ឈូ ប៊ុនរឿង ប្រធានមន្ទីរអប់រំ យុវជន និងកីឡាខេត្ត លោក ស្រេង សុផល អភិបាលក្រុងសិរីសោភ័ណ ព្រមទាំងលោកនាយក នាយករង លោកគ្រូ អ្នកគ្រូ ជនជាតិខ្មែរ ជនជាតិចិន អាណាព្យាបាលសិស្សានុសិស្សផងដែរ។ ថ្លែងក្នុងឱកាសនោះ ឯកឧត្តម បានសម្តែងការកោតសរសើរ ចំពោះថ្នាក់ដឹកនាំ លោកគ្រូ អ្នកគ្រូ ដែលបានយកចិត្តទុកដាក់ក្នុងការអប់រំ បណ្តុះបណ្តាលនាពេលកន្លងមក ព្រោះថាការងារអប់រំ គឺជាការងាររបស់យើងទាំងអស់គ្នា រួមសាមគ្គីគ្នា ដើម្បីអនាគតសិស្សានុសិស្ស កែប្រែជោគវាសនា និងក្តីសុបិន្តឱ្យក្លាយជាការពិត។ ត្រូវចូលរួមបណ្ដុះបណ្ដាលអភិវឌ្ឍន៍គុណសម្បទាសិស្សានុសិស្សនូវចំណេះដឹង ជំនាញ ទេពកោសល្យច្នៃប្រឌិត បំណិនសតវត្សទី២១ គុណសម្បទាពលរដ្ឋសាកល និងក្រមសីលធម៌ប្រកបដោយមនសិការស្នេហាជាតិ ដើម្បីក្លាយជាអ្នកដឹកនាំសម្រាប់អភិវឌ្ឍប្រទេសជាតិនាពេលអនាគត។ ការការអភិវឌ្ឍន៍ធនធានមនុស្ស គឺជាការវិនិយោគរយៈពេលវែងរបស់សង្គមជាតិនឹងត្រូវការចូលរួមជាចាំបាច់នូវការការពារថែទាំ និងជ្រោមជ្រែងពីគ្រប់មជ្ឈដ្ឋាន ដើម្បីធានាថា ធនធានមនុស្សដែលយើងផលិតបានឆ្លើយតបទៅនឹងតម្រូវការ នៃការអភិវឌ្ឍសង្គមសេដ្ឋកិច្ច និងការប្រកួតប្រជែងនៅក្នុងតំបន់ និងសាកលលោក។