នាព្រឹកថ្ងៃទី១១ ខែកក្កដា ឆ្នាំ២០២៤ ឯកឧត្តម ប្រាក់ ចំរើន អនុប្រធានក្រុមសមាជិកព្រឹទ្ធសភាប្រចាំភូមិភាគទី៣ (ខេត្តកណ្តាល) និងជាអនុប្រធានគណៈកម្មការទី៨ ព្រឹទ្ធសភា រួមជាមួយលោក សាមុត ធឿន ប្រធានក្រុមប្រឹក្សាស្រុកអង្គស្នួល លោក នូ សុវណ្ណរិទ្ធ អភិបាលរងស្រុកអង្គស្នួល បានអញ្ជើញជួបសំណេះសំណាល និងសួរសុខទុក្ខក្រុមប្រឹក្សាឃុំ ស្មៀនឃុំ មេភូមិទាំង១០ នាយប៉ុស្ត៍នគបាលរដ្ឋបាល និងប្រធានមណ្ឌលសុខភាព ស្ថិតនៅសាលាឃុំដំណាក់អំពិល ស្រុកអង្គស្នួល ខេត្តកណ្តាល ដើម្បីសិក្សាឈ្វេងយល់ពីវឌ្ឍនភាពការងារ ប្រមូលបញ្ហាប្រឈមនានា និងសំណូមពររបស់អាជ្ញាធរនៅមូលដ្ឋានភូមិភាគទី៣។ ក្នុងឱកាសដ៏ថ្លៃថ្លានោះ ឯកឧត្តម ប្រាក់ ចំរើន បានមានប្រសាសន៍ពាំនាំនូវការផ្តាំផ្ញើសាកសួរសុខទុក្ខពីសំណាក់ថ្នាក់ដឹកនាំព្រឹទ្ធសភា ជូនដល់ក្រុមប្រឹក្សាស្រុក ក្រុមប្រឹក្សាឃុំ សង្កាត់ ប្រកបដោយក្តីនឹករលឹក និងគិតគូរដោយយកចិត្តទុកដាក់ខ្ពស់ អំពីសុខទុក្ខ សុខុមាលភាព និងជីវភាពរស់នៅរបស់អាជ្ញាធរឃុំ និងបងប្អូនប្រជាពលរដ្ឋគ្រប់ពេលវេលា។ ឯកឧត្តម បានអំពាវនាវដល់អាជ្ញាធរមូលដ្ឋានទាំងអស់ឱ្យចូលរួមថែរក្សាសន្តិសុខ សណ្តាប់ធ្នាប់ អនាម័យ និងបរិស្ថានក្នុងមូលដ្ឋានរបស់ខ្លួនឱ្យបានល្អប្រសើរ។ បន្ទាប់ពីរកិច្ចសំណេះសំណាល ឯកឧត្តម បានឧបត្ថម្ភថវិកា និងសារ៉ុងចំនួន២៦ ជូនដល់ក្រុមប្រឹក្សាឃុំ ស្មៀនឃុំ មេភូមិទាំង១០ នាយប៉ុស្តិ៍នគបាលរដ្ឋបាល ប្រមណ្ឌលសុខភាព លោកនាយកសាលាបឋមសិក្សាពងទឹក និងថ្នល់ទទឹង សរុបជាថវិកាចំនួន ៣,៥០០,០០០រៀល និងបាននាំយកទានព្រះវស្សា ទេយ្យទាន និងបច្ច័យប្រគេនព្រះសង្ឃនៅវត្តដំណាក់អំពិល ស្ថិតនៅឃុំដំណាក់អំពិល ស្រុកអង្គស្នួល ខេត្តកណ្តាល៕
ប្រភព៖ ការិយាល័យអមក្រុមសមាជិកព្រឹទ្ធសភាប្រចាំភូមិភាគទី៣
