នាព្រឹកថ្ងៃទី២៨ ខែកញ្ញា ឆ្នាំ២០២៤ នៅទីស្នាក់ការកណ្តាលកាកបាទក្រហមកម្ពុជា លោកជំទាវបណ្ឌិត អ៊ុក ម៉ាលី សមាជិកាគណៈកម្មការទី២ ព្រឹទ្ធសភា បានអញ្ជេីញចូលរួមពិធីសំណេះសំណាលសួរសុខទុក្ខ និងចែកអំណោយមនុស្សធម៌ជូនសមាជិកមូលនិធិត្រីចក្រយានកម្ពុជា (ស៊ីក្លូ) ចំនួន ៣១១នាក់ ក្នុងរាជធានីភ្នំពេញ ក្រោមអធិបតីភាពដ៏ខ្ពង់ខ្ពស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។
នេះគឺជាជំនួបលើកទី១ រវាងកាកបាទក្រហមកម្ពុជា និងសមាជិកមូលនិធិត្រីចក្រយានកម្ពុជា (ស៊ីក្លូ) ក្នុងរាជធានីភ្នំពេញ ក្នុងឱកាសអបអរទិវាមនុស្សចាស់កម្ពុជា ១តុលា និងក្នុងឱកាសបុណ្យកាន់បិណ្ឌ-ភ្ជុំបិណ្ឌនេះផង។
អំណោយកាកបាទក្រហមកម្ពុជា ដែលទទួលបានពីសប្បុរសជនគ្រប់មជ្ឈដ្ឋាន បានចែកជូនសមាជិកមូលនិធិត្រីចក្រយានកម្ពុជា ក្នុងម្នាក់ៗរួមមាន៖ បាយ ១ប្រអប់ បង្អែមនំចាក់ក្រចាន់ ១ប្រអប់ ផ្លែទំពាំងបាយជូ ១គីឡូក្រាម, ក្រូចឃ្វិច ១គីឡូក្រាម ទឹកក្រូច ១ដប ទឹកបរិសុទ្ធអារុណា ២ដប អង្ករ ២៥គីឡូក្រាម មី ១កេស ត្រីខ ១០កំប៉ុង ឃីត (មុង ភួយ សារុង ក្រមា) ១កញ្ចប់ ទឹកដោះគោខាប់ ៥កំប៉ុង ភេសជ្ជៈបាកាស់ ៤កំប៉ុង អាវយឺតដៃវែង១ អាវអាចារ្យ១ ខោជើងវែង២ ស្បែកជើង ១គូ អាវភ្លៀង១ និងថវិកា ៣០០.០០០រៀល។
