នាព្រឹកថ្ងៃអង្គារ ទី៤ ខែកុម្ភៈ ឆ្នាំ២០២៥ ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា និងលោកជំទាវ បានអញ្ជើញនាំយកសម្ភារៈសិក្សា កង់ និងទូរទស្សន៍ ចែកជូនដល់សិស្សានុសិស្ស នៅសាលាបឋមសិក្សាអាត់ស៊ូ និងសាលាបឋមសិក្សាកូនក្អែក ស្ថិតនៅក្នុងឃុំសំបូរណ៍ ស្រុកប្រាសាទសំបូរ ខេត្តកំពង់ធំ។

ក្នុងឱកាសនោះ ឯកឧត្តមបណ្ឌិត បានផ្តាំផ្ញើដល់លោកគ្រូ អ្នកគ្រូ និងសិស្សានុសិស្ស ត្រូវយកចិត្តទុកដាក់លើកត្តាសំខាន់ពីរយ៉ាង ដើម្បីរួមចំណែកអភិវឌ្ឍខ្លួនផង និងប្រទេសជាតិផងនោះគឺ៖
ទី១- កត្តាសុខភាព ត្រូវផ្ដោតលើការបរិភោគដែលមានអាហារូបត្ថម្ភគ្រប់គ្រាន់ ដើម្បីសុខភាពល្អរឹងមាំ
ទី២- កត្តាអប់រំ ត្រូវផ្ដោតលើសិក្សាបន្ថែមនូវភាសាអង់គ្លេស ដែលជាយានជួយឱ្យយើងអាចពង្រីកចំណេះដឹងកាន់តែទូលាយក្នុងកម្រិតសកល។

ឯកឧត្តមបណ្ឌិត បានបញ្ជាក់ថាចំពោះទូរទស្សន៍ដែលសាលាទាំងពីរបានទទួលនាពេលនេះ គឺសម្រាប់ទុកឱ្យកុមារ (ជាពិសេសកុមារនៅតាមជនបទ) អាចរៀនភាសាអង់គ្លេសតាមកម្មវីធីអប់រំដែលមានជាច្រើនក្នុងប្រព័ន្ធអ៉ីនធឺណិត ដូចជា Youtube និង តាមគេហទំព័រ E-Learning ជាច្រើនទៀត ដែលបង្រៀនពីព្យញ្ជនៈ អនាម័យ សុខភាព វិទ្យាសាស្រ្ដជាដើម…។

ខ្លឹមសារ៖ ខុទ្ទកាល័យឯកឧត្តមអនុប្រធានទី២ ព្រឹទ្ធសភា
រូបភាព៖ នាយកដ្ឋានព័ត៌មាន