នាព្រឹកថ្ងៃពុធ ទី៩ ខែកក្កដា ឆ្នាំ២០២៥ ក្រុមសមាជិកាព្រឹទ្ធសភា ដឹកនាំដោយលោកជំទាវ ឃួន ឃុនឌី លេខាធិការក្រុមសមាជិកាព្រឹទ្ធសភា បានអញ្ជើញជួបសំណេះសំណាលដាច់ដោយឡែកពីគ្នាជាមួយក្រុមប្រឹក្សាឃុំ ស្មៀន ក្នុងឃុំទួលគគីរ ចំនួន៦នាក់ ឃុំពាមក្រសោប ចំនួន៦នាក់ ស្រុកមណ្ឌលសីមា ខេត្តកោះកុង។

ពិធីសំណេះសំណាលនេះ ដើម្បីផ្សារភ្ជាប់ និងការរួមប្រាស្រ័យទំនាក់ទំនងឱ្យកាន់តែជិតស្និទ្ធជាមួយអង្គបោះឆ្នោត ដែលជាសមាជិកក្រុមប្រឹក្សាឃុំនៅមូលដ្ឋាន និងដើម្បីជួបប្រាស្រ័យទំនាក់ទំនង ពិគ្រោះយោបល់ ស្វែងយល់ពីតម្រូវការ បញ្ហាប្រឈម និងសំណូមពររបស់ក្រុមប្រឹក្សាឃុំ។

ក្នុងឱកាសនោះ លោកជំទាវ ឃួន ឃុនឌី បាននាំយកនូវការផ្តាំផ្ញើសួរសុខទុក្ខពីថ្នាក់ដឹកនាំព្រឹទ្ធសភា ជាពិសេសពីសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា ជូនដល់ក្រុមប្រឹក្សាឃុំ និងប្រជាពលរដ្ឋទាំងអស់ ក្នុងស្រុកមណ្ឌលសីមា។

លោកជំទាវ ឃួន ឃុនឌី បានជម្រាបជូនដល់ក្រុមប្រឹក្សាឃុំ និងអ្នកពាក់ព័ន្ធ អំពីសមិទ្ធផលធំៗរបស់ប្រទសជាតិ និងសមិទ្ធផលរបស់ព្រឹទ្ធសភាក្នុងរយៈពេល៦ខែ ឆ្នាំ២០២៥ ព្រមទាំងបញ្ហាព្រំដែនកម្ពុជា-ថៃ។

លោកជំទាវ ឃួន ឃុនឌី បានវាយតម្លៃខ្ពស់ចំពោះសមិទ្ធផលស្នាដៃសំខាន់ៗ ក្នុងការដឹកនាំគ្រប់គ្រង និងការអភិវឌ្ឍមូលដ្ឋានរបស់រដ្ឋបាលថ្នាក់ក្រោមជាតិ ជាពិសេសសមាជិក សមាជិកាក្រុមប្រឹក្សាឃុំ ដែលជាអ្នកធ្វើការផ្ទាល់នៅជាមួយប្រជាជននៅមូលដ្ឋាន…។

ប្រភព៖ នាយកដ្ឋានព័ត៌មាន