នៅព្រឹកថ្ងៃទី ០៤ ខែកញ្ញាឆ្នាំ២០២៥ ឯកឧត្តម ស្លេះ ពុនយ៉ាមុីន សមាជិកព្រឹទ្ធសភាប្រចាំភូមិភាគ២ បានចុះជួបសំណេះសំណាលនិងសួរសុខទុក្ខប្អូៗសិស្សានុសិស្សចំនួន៥នាក់ ដែលត្រូវទៅបន្តការនៅប្រទេសម៉ាឡេសុី និងឥណ្ឌូណេសុី នៅសាលាហាហ្វីស កុមារកំព្រា អាល់អៀហសាន កម្ពុជា ក្នុងភូមិកំពង់ក្របី ឃុំគគរ ស្រុកកំពង់សៀម ខេត្តកំពង់ចាម ។
ឆ្លៀតក្នុងឱកាសនោះដែរ ឯកឧត្តមបានពាំនាំនូវការផ្តាំផ្ញើសួរសុខពីរឯកឧត្តម អ៊ុច បូររិទ្ធ អនុប្រធានទី១ព្រឹទ្ធសភា និងជាប្រធានក្រុមសមាជិកព្រឹទ្ធសភាប្រចាំភូមិភាគ២ ។
ឯកឧត្តម ស្លេះ ពុនយ៉ាមុីន បានបញ្ជាក់បន្ថែមថា ឯកឧត្តម អ៊ុច បូររិទ្ធ អនុប្រធានទី១ព្រឹទ្ធសភា លោកតែងយកចិត្តទុកដាក់ខ្ពស់ចំពោះបងប្អូនយើងដែលជាអ្នកកាន់សាសនាឥស្លាម ទោះបីជាយើងកាន់សាសនាផ្សេងគ្នាក៏ពិតមែន តែយើងគឺជាខ្មែរតែមួយ ការយកចិត្តដាក់ចំពោះថ្នាក់ដឹកនាំគឺដូចគ្នា មិនប្រកាន់ឬរើសអើងអ្វីឡើយ ហើយក៏សូមឲ្យប្អូនៗខិតខំប្រឹងប្រែងរៀនសូត្រនិងត្រូវចាប់យកជំនាញបច្ចេកទេសសំខាន់ៗដើម្បីរួមចំណែកក្នុងការអភិវឌ្ឍប្រទេសជាតិនាពេលអនាគត ។
ជាចុងក្រោយក្នុងនាមឯកឧត្តម អ៊ុច បូររិទ្ធ អនុប្រធានទី១ ព្រឹទ្ធសភា ឯកឧត្តម ស្លេះ ពុនយ៉ាមុីន បាននាំយកថវិកាចំនួន ១,៥០០ដុល្លា ជូនប្អូនៗចំនួន៥នាក់ដើម្បីបន្តការសិក្សានៅម៉ាឡេសុី និងឥណ្ឌូណេសុី ចំណែកប្អូនៗចំនួន២៥នាក់ក្នុងម្នាក់ទទួលថវិកា២មុឺនរៀល លោកគ្រូនិងគណៈគ្រប់គ្រងសាលាចំនួន៥នាក់ក្នុងម្នាក់ៗទទួលបានថវិកា១០មុឺនរៀល ។
