នាព្រឹកថ្ងៃព្រហស្បតិ៍ ទី១១ ខែកញ្ញា ឆ្នាំ២០២៥ អគ្គលេខាធិការដ្ឋានព្រឹទ្ធសភា បានរៀបចំកិច្ចប្រជុំបូកសរុបលទ្ធផលការងារប្រចាំខែសីហា និងកំណត់ទិសដៅការងារខែកញ្ញា ឆ្នាំ២០២៥ ក្រោមអធិបតីភាពឯកឧត្តម ឡាយ សំកុល អគ្គលេខាធិការព្រឹទ្ធសភា នៅសាលសិក្ខាសាលាខាងជើង វិមានព្រឹទ្ធសភា ដោយមានការអញ្ជើញចូលរួមពីថ្នាក់ដឹកនាំអង្គភាពចំណុះអគ្គលេខាធិការដ្ឋានព្រឹទ្ធសភា ចាប់ពីប្រធាននាយកដ្ឋានឡើង។
ក្នុងឱកាសនោះ ឯកឧត្តមអគ្គលេខាធិការ បានអរគុណចំពោះថ្នាក់ដឹកនាំ មន្ត្រីរាជការ នៃអគ្គលេខាធិការដ្ឋានព្រឹទ្ធសភាគ្រប់ជាន់ថ្នាក់ ដែលបានខិតខំប្រឹងប្រែងបំពេញការងារដោយសម្រេចបានលទ្ធផលយ៉ាងល្អជូនស្ថាប័ន ជាពិសេសការរៀបចំដំណើរទស្សនកិច្ចរបស់សម្តេចតេជោ អញ្ជើញចូលរួមខួបអនុស្សាវរីយ៍លើកទី៨០ នៃបដិវត្តន៍ ខែសីហា និងទិវាបុណ្យជាតិនៃសាធារណរដ្ឋសង្គមនិយមវៀតណាម ព្រមទាំងដំណើរទស្សនកិច្ចផ្លូវរដ្ឋរបស់ឯកឧត្តមប្រធានាធិបតីហ្វីលីពីន មកកាន់ព្រះរាជាណាចក្រកម្ពុជា កាលពីពេលថ្មីៗនេះ។ ទន្ទឹមនឹងនេះ អគ្គលេខាធិការដ្ឋានព្រឹទ្ធសភា ក៏បានរៀបចំបង្កើតក្រុមការងារផ្សេងៗ ដូចជា ក្រុមការងារអភិវឌ្ឍន៍ស្ថាប័ន, ក្រុមការងារស្រាវជ្រាវកិច្ចការតំបន់និងអន្តរជាតិ, ក្រុមការងារបច្ចេកវិទ្យាព័ត៌មាន, និងក្រុមការងារស្រាវជ្រាវ ចងក្រងកេរដំណែលរបស់ព្រឹទ្ធសភា…។
ចំពោះទិសដៅនាពេលខាងមុខ ឯកឧត្តមអគ្គលេខាធិការ បានណែនាំដល់អង្គភាពពាក់ព័ន្ធត្រៀមរៀចំកិច្ចប្រជុំរបស់ព្រឹទ្ធសភា ដើម្បីពិនិត្យសេចក្តីព្រាងច្បាប់ ដែលរដ្ឋសភានឹងបញ្ជូនមកនាពេលខាងមុខនេះ និងបានជម្រាបអំពីគម្រោងរំដោះទឹកភ្លៀងក្នុងបរិវេណព្រឹទ្ធសភា ដែលមានការជួយគាំទ្រពីសាលារាជធានីភ្នំពេញ, ការស្នើសុំចូលនិវត្តន៍មុនកាលកំណត់របស់មន្រ្តីរាជការ, ការងារបេឡាសោធនិវត្តន៍, និងការឧបត្ថម្ភថវិកាជូនមន្រ្តីរាជការក្នុងឱកាសពិធីបុណ្យភ្ជុំបិណ្ឌ។
មុននឹងបញ្ចប់ ឯកឧត្តមអគ្គលេខាធិការ បានជូនពរដល់ថ្នាក់ដឹកនាំ មន្រ្តីរាជការទាំងអស់ សូមធ្វើដំណើរប្រកបដោយសុខសុវត្ថិភាពក្នុងក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌនេះ៕
ប្រភព៖ នាយកដ្ឋានព័ត៌មាន
