នារសៀលថ្ងៃព្រហស្បតិ៍ ទី៦ ខែវិច្ឆិកា ឆ្នាំ២០២៥ ឯកឧត្តម ឡាយ សំកុល អគ្គលេខាធិការព្រឹទ្ធសភា បានដឹកនាំគណៈប្រតិភូអគ្គលេខាធិការដ្ឋានព្រឹទ្ធសភា អញ្ជើញគោរពវិញ្ញាណក្ខន្ធសពលោក យឿង យ៉ា អនុប្រធានការិយាល័យ នៃជំនួយការអគ្គនាយកសេវាច្បាប់ និងសមូហភាពដែនដី នៃអគ្គលេខាធិការដ្ឋានព្រឹទ្ធសភា ក្នុងជន្មាយុ ៤៤ឆ្នាំ និងកុមារា យិន ធនិន ត្រូវជាកូនប្រុសបង្កើត ក្នុងជន្មាយុ ៥ឆ្នាំ ដែលបានទទួលមរណភាព កាលពីយប់ថ្ងៃពុធ ១៥កើត ខែកត្តិក ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៥ ខែវិច្ឆិកា ឆ្នាំ២០២៥ វេលាម៉ោង ២១:៥០ នាទី ដោយគ្រោះថ្នាក់ចរាចរណ៍។
ក្នុងវេលាប្រកបដោយទុក្ខសោករកទីបំផុតគ្មាននេះ ឯកឧត្តមអគ្គលេខាធិការ បានពាំនាំនូវការចូលរួមរំលែកទុក្ខ និងថវិការបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ព្រមទាំងថ្នាក់ដឹកនាំព្រឹទ្ធសភា ជូនចំពោះក្រុមគ្រួសារសព ដែលត្រូវជាភរិយា និងជាម្តាយ ព្រមទាំងក្រុមគ្រួសារ ចំពោះមរណភាពរបស់លោក យឿង យ៉ា ដែលត្រូវជាស្វាមី និងកុមារា យិន ធនិន ដែលត្រូវជាកូនប្រុស ជាទីស្រឡាញ់ ប្រកបដោយព្រហ្មវិហារធម៌ និងសង្គហធម៌ដ៏ល្អប្រពៃ ព្រមទាំងជាទីស្រឡាញ់ស្មើនឹងជីវិតម្តាយ។ សូមដូងវិញ្ញាណក្ខន្ធលោក យឿង យ៉ា និងកុមារា យិន ធនិន បានទៅកាន់សុគិភពកុំបីឃ្លៀងឃ្លាតឡើយ។
សពលោក យឿង យ៉ា និងកុមារា យិន ធនិន ត្រូវបានតម្កល់ធ្វើបុណ្យទក្ខិណានុប្បទានតាម ប្រពៃណីជាតិ នៅភូមិស្វាយឬស្សី សង្កាត់បារាយណ៍ ក្រុងដូនកែវ ខេត្តតាកែវ៕
ប្រភព៖ នាយកដ្ឋានព័ត៌មាន
