នារសៀលថ្ងៃចន្ទ ទី៧ ខែមេសា ឆ្នាំ២០២៥ ឯកឧត្តម ងី ច័ន្ទ្រផល ប្រធានគណៈកម្មការសិទ្ធិមនុស្ស ទទួលពាក្យបណ្តឹង និងអង្កេតនៃព្រឹទ្ធសភា (គណៈកម្មការទី១) បានអញ្ជើញចូលរួមកិច្ចប្រជុំគណៈកម្មាធិការអចិន្ត្រៃយ៍ ស្ដីពីប្រជាធិបតេយ្យ និងសិទ្ធិមនុស្ស នៃមហាសន្និបាតលើកទី១៥០ នៃសហភាពអន្តរសភា ដោយបានចូលរួមថ្លែងបទអន្តរាគមន៍លើរបៀបវារៈចំនួន២៖

ក្នុងរបៀបវារៈស្ដីពី “ការទទួលស្គាល់ និងគាំទ្រជនរងគ្រោះពីការស្មុំកូនដោយខុសច្បាប់អន្តរជាតិ និងការទប់ស្កាត់ ដើម្បីប្រសិទ្ធភាព និងធានាបាននូវយុត្តិធម៌សម្រាប់ជនរងគ្រោះ ក្នុងការប្រយុទ្ធប្រឆាំងនឹងការស្មុំកូនឆ្លងប្រទេសដោយខុសច្បាប់។
ឯកឧត្តមបានអំពាវនាវដល់បណ្ដាសភា៖
(១) ពង្រឹងច្បាប់ស្មុំកូនជាតិ និងអន្តរជាតិ ឱ្យស្របតាមឧត្តមានុវត្តន៍អន្តរជាតិ
(២)ពង្រឹងកិច្ចសហប្រតិបត្តិការឆ្លងព្រំដែន
(៣)ទទួលស្គាល់ និងគាំទ្រជនរងគ្រោះ
(៤) គ្រប់គ្រងមណ្ឌលកុមារកំព្រា និងទីភ្នាក់ងារស្មុំកូន
(៥) ដោះស្រាយហានិភ័យនៃការស្មុំកូនក្នុងវិបត្តិមនុស្សធម៌។

ក្នុងរបៀបវារៈស្ដីពី “ការតាមដានការអនុវត្តសេចក្ដីសម្រេចចិត្តឆ្នាំ ២០២៤៖ ផលប៉ះពាល់នៃបញ្ញាសិប្បនិមិត្តលើលទ្ធិប្រជាធិបតេយ្យ សិទ្ធិមនុស្ស និងនីតិរដ្ឋ” ។
ឯកឧត្តមបានចែករំលែកទស្សនៈយល់ឃើញអំពីបញ្ហាប្រឈមនៃបញ្ញាសិប្បនិមិត្ត និងគូសបញ្ជាក់អំពីការប្ដេជ្ញាចិត្តរបស់កម្ពុជាក្នុងការពង្រឹងអភិបាលកិច្ចបញ្ញាសិប្បនិមិត្តប្រកបដោយទំនួលខុសត្រូវ។ ទន្ទឹមនោះ ឯកឧត្តមក៏បានអំពាវនាវឱ្យបណ្ដាសភានានា ធានាថាបញ្ញាសិប្បនិមិត្តជាកម្លាំងនៃតម្លាភាព គណនេយ្យភាព និងបរិយាប័ន្ន និងត្រូវចាត់វិធានការឱ្យបានម៉ឺងម៉ាត់ក្នុងការពង្រួញគម្លាតរវាងបច្ចេកវិទ្យា និងនីតិកម្ម ដើម្បីធានាថា បញ្ញាសិប្បនិមិត្តពង្រឹងប្រជាធិបតេយ្យ ដោយគ្មានគំរាមកំហែង។

ប្រភព៖ ខុទ្ទកាល័យឯកឧត្តមអនុប្រធានទី១ ព្រឹទ្ធសភា