នាថ្ងៃទី២៥ ខែឧសភា ឆ្នាំ២០២៥ ឯកឧត្ដមបណ្ឌិត ចែម វីឌ្យ៉ា ប្រធានគណៈកម្មការកិច្ចការបរទេស សហប្រតិបត្តិការអន្ដរជាតិ និងព័ត៌មាន (គណៈកម្មការទី៥) ព្រឹទ្ធសភា រួមជាមួយឯកឧត្ដម សួស យ៉ារ៉ា ប្រធានគណៈកម្មការទី៥រដ្ឋសភា និងឯកឧត្ដម ទី សុគន្ធ លេខាធិការគណៈកម្មការទី៥រដ្ឋសភា បានអមគណៈប្រតិភូរដ្ឋសភាដឹកនាំដោយ ឯកឧត្ដមកិត្តិសេដ្ឋាបណ្ឌិត ជាម យៀប អនុប្រធានទី១រដ្ឋសភា និងជាប្រធានក្រុមជាតិអាយប៉ារបស់រដ្ឋសភានៃព្រះរាជាណាចក្រកម្ពុជា អញ្ជើញចូលរួមកិច្ចប្រជុំផ្ទៃក្នុងរបស់សភាសមាជិកអាយប៉ា មុននឹងចូលរួមកិច្ចប្រជុំរួមគ្នា រវាងថ្នាក់ដឹកនាំអាយប៉ា និង ប្រមុខដឹកនាំអាស៊ាន ដើម្បីពិភាក្សាលើសេចក្តីព្រាងសាររបស់អាយប៉ា ដែលឆ្លុះបញ្ចាំងលើប្រធានបទ «បរិយាបន្នភាពនិងនិរន្តរភាព» នៃកិច្ចប្រជុំកំពូលអាស៊ានលើកទី៤៦ ក្រោមអធិបតីភាពឯកឧត្តមបណ្ឌិត Johari bin Abdul ប្រធានរដ្ឋសភាម៉ាឡេស៊ី និងជាប្រធានមហាសន្និបាតអាយប៉ា លើកទី៤៦ នៅវិមានរដ្ឋសភានៃសហព័ន្ធម៉ាឡេស៊ី។

ថ្លែងក្នុងកិច្ចប្រជុំនេះ ឯកឧត្ដមអនុប្រធានទី១រដ្ឋសភា បានឧទ្ទេសនាមឯកឧត្ដមបណ្ឌិត ចែម វីឌ្យ៉ា ប្រធានគណៈកម្មការទី៥ព្រឹទ្ធសភា ជាបេក្ខភាពអគ្គលេខាធិការអាយប៉ាសម្រាប់អាណត្តិ ២០២៥-២០២៨ ដោយបានទទួលការអបអរសាទរដោយទះដៃ ពីថ្នាក់ដឹកនាំអាយប៉ាទាំងអស់។

ក្រោយពីកិច្ចប្រជុំផ្ទៃក្នុងនេះ ឯកឧត្ដម ចែម វីឌ្យ៉ា ប្រធានគណៈកម្មការទី៥ព្រឹទ្ធសភា ជាមួយឯកឧត្ដម សួស យ៉ារ៉ា ប្រធាគណៈកម្មការទី៥រដ្ឋសភា បានអញ្ជើញអម ឯកឧត្ដមអនុប្រធានទី១រដ្ឋសភា ជួបសំណេះសំណាល និងពិភាក្សាការងារជាមួយ ឯកឧត្ដម Johari bin Abdul ប្រធានរដ្ឋសភាម៉ាឡេស៊ី និងជាប្រធានមហាសន្និបាតអាយប៉ាលើកទី៤៦ និងលោកជំទាវ Maria Fernanda Lay ប្រធានរដ្ឋសភានៃសាធារណរដ្ឋប្រជាធិបតេយ្យទីម័រខាងកើត។

បន្ទាប់មក ឯកឧត្ដមបណ្ឌិត ចែម វីឌ្យ៉ា ប្រធានគណៈកម្មការទី៥ព្រឹទ្ធសភា រួមជាមួយឯកឧត្ដម សួស យ៉ារ៉ា ប្រធាគណៈកម្មការទី៥រដ្ឋសភា បានអញ្ជើញជួបពិភាក្សាការងារជាមួយលោកជំទាវ Siti Rozaimeriyanty Dato Haji Abdul Rahman អគ្គលេខាធិការអាយប៉ាបច្ចុប្បន្នសម្រាប់អាណត្តិឆ្នាំ ២០២២-២០២៥។