ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា បានអញ្ជើញទទួលជួបជាមួយ លោកស្រី វ៉ង យ៉ាហួយ ប្រធានមូលនិធិចិនដើម្បីសន្តិភាព និងការអភិវឌ្ឍ និងសហការី កាលពីថ្ងៃទី២៧ ខែវិច្ឆិកា ឆ្នាំ២០២៥ ដើម្បីពិភាក្សាអំពីការលើកកម្ពស់គុណភាពជិវិតប្រជាជន តាមរយៈការផ្តល់មូលនិធិជួយវិស័យកសិកម្ម កសិ-ឧស្សាហកម្ម ការអប់រំ សុខាភិបាល និងទេសចរណ៍។
លោកស្រី ប្រធានមូលនិធិ បានជម្រាបថា មូលនិធិចិនដើម្បីសន្តិភាព និងការអភវឌ្ឍបង្កើតនៅឆ្នាំ២០១១ នៅរដ្ឋធានីប៉េកាំង ក្រោមបេសកកម្មចូលរួមកសាង សន្តិភាព និងការអភិវឌ្ឍ នៅបណ្តាប្រទេសជាមិត្តរបស់ចិននៅលើពិភពលោក។ សមិទ្ធផល និងស្នាដៃ ជាច្រើនរបស់មូលនិធិ នៅក្នុងប្រទេសកម្ពុជា ផ្តោតលើការកសាងសាលារៀន បណ្ណាល័យ មន្ទីរពេទ្យ និងការអភិវឌ្ឍភូមដាច់ស្រយ៉ាល។ លោកស្រីបានបញ្ជាក់ថា សកម្មភាពរបស់មូលនិធិ គឺត្រូវអនុវត្តទៅតាមផែនការ ៥ឆ្នាំលើកទី១៥ របស់ចិន (២០២៦-២០៣០) ដែលសំដៅកសាងសហគមជោគវាសនារួម ប្រកបដោយសន្តិភាព និងវិបុលភាព។
ថ្លែងក្នុងឱកាសនោះ ឯកឧត្តមបណ្ឌិត ធន់ វឌ្ឍនា បានវាយតម្លៃខ្ពស់ និងសាទរចំពោះសមិទ្ធផលដែល មូលនិធិចិនដើម្បីសន្តិភាព និងការអភិវឌ្ឍ និងមូលនិធិ Peaceland បានចូលរួមក្នុងការលើកកម្ពស់វិបុលភាពសង្គមកម្ពុជាកន្លងមក។
ឯកឧត្តមបណ្ឌិត ធន់ វឌ្ឍនា លើកទឹកចិត្តមូលនិធិចិនដើម្បីសន្តិភាព និងការអភិវឌ្ឍ កសាងភូមិគម្រូបន្ថែមទៀត ឱ្យបានគ្រប់ភូមិភាគទាំង ៨ ដោយគួរផ្តោតលើការអប់រំកុមារ និងសុខភាព ដែលជាកត្តាគន្លឹះរុញច្រានវិបុលភាពសង្គមនាថ្ងៃអនាគត។
ខ្លឹមសារ៖ ខុទ្ទកាល័យឯកឧត្តមអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន
