នៅថ្ងៃទី២៧ ខែមករា ឆ្នាំ២០២៦ ឯកឧត្តម ងី ច័ន្ទ្រផល ប្រធានគណៈកម្មការទី១ព្រឹទ្ធសភា បន្តដឹកនាំគណៈប្រតិភូសភាកម្ពុជា ចូលរួមក្នុងកិច្ចប្រជុំគណៈកម្មាធិការអចិន្ត្រៃយ៍របស់ APA មួយចំនួន ស្តីពីកិច្ចការសង្គម និងវប្បធម៌, កិច្ចការនយោបាយ និងថវិកា និងផែនការ និងពិធីបិទមហាសន្និបាត នៅទីក្រុងម៉ាណាម៉ា ប្រទេសបារ៉ែន។
អមដំណើរគណៈប្រតិភូចូលរួមនាពេលនោះរួមមាន ឯកឧត្តម យស ផានីត្តា ប្រធានគណៈកម្មការទី២ព្រឹទ្ធសភា, ឯកឧត្តម អង្គ វង្សវឌ្ឍនា ប្រធានគណៈកម្មការទី៦រដ្ឋសភា និងមន្ត្រីនៃអគ្គលេខាធិការដ្ឋានព្រឹទ្ធសភា-រដ្ឋសភា។
មហាសន្និបាតលើកទី១៦ នៃសភាតំបន់អាស៊ី (APA) បានធ្វើការអនុម័តទៅលើសេចក្តីសម្រេចសរុបទាំងអស់ចំនួន ២៧ ឋិតក្រោមគណៈកម្មាធិការអចិន្ត្រៃយ៍ទាំងបួន និងសេចក្តីប្រកាសទីក្រុងម៉ាណាម៉ា។ មហាសន្និបាត ក៏បានអនុម័តផងដែរទៅលើប្រធានដឹកនាំ និងទទួលធ្វើជាម្ចាស់ផ្ទះរៀបចំកិច្ចប្រជុំគណៈកម្មាធិការអចិន្ត្រៃយ៍ទាំងបួនរបស់ APA សម្រាប់ឆ្នាំ២០២៦ គឺ៖ ប្រទេសអ៊ីរ៉ង់ ជាប្រធានកិច្ចប្រជុំគណៈកម្មាធិការអចិន្ត្រៃយ៍កិច្ចការ សេដ្ឋកិច្ច និងការអភិវឌ្ឍប្រកបដោយចីរភាព, ប្រទេសតាហ្ស៊ីគីស្ថានជាប្រធានកិច្ចប្រជុំគណៈកម្មាធិការអចិន្រ្តៃយ៍កិច្ចការសង្គម និងវប្បធម៌, ប្រទេសហ្ស៊កដានី ជាប្រធានកិច្ចប្រជុំគណៈកម្មាធិការអចិន្ត្រៃយ៍កិច្ចការនយោបាយ និងប្រទេសកាតា ជាប្រធានដឹកនាំកិច្ចប្រជុំគណៈកម្មាធិការអចិន្ត្រៃយ៍កិច្ចការផែនការ និងថវិការបស់ APA។
គួរជម្រាបជូនផងដែរថា គណៈប្រតិភូសភាកម្ពុជា ត្រូវបានជ្រើសតាំងជាអ្នករាយការណ៍ (Rapporteur) ផងដែរក្នុងអំឡុងពេល នៃមហាសន្និបាតលើកទី១៦ នេះ។
ប្រភព៖ នាយកដ្ឋានទំនាក់ទំនងអន្តរជាតិ
