នារសៀលថ្ងៃទី១៥ ខែតុលា ឆ្នាំ២០២២ ឯកឧត្ដម ឈើយ ចាន់ណា លេខាធិការគណៈកម្មការទី៧ ព្រឹទ្ធសភា និងជាសមាជិកក្រុមសមាជិកព្រឹទ្ធសភា ប្រចាំភូមិភាគទី៤ រួមជាមួយលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត លោក ស្រេង សុផល អភិបាលក្រុងសិរីសោភ័ណ ខេត្តបន្ទាយមានជ័យ បានអញ្ជើញចូលរួមជាអធិបតីក្នុងពិធីប្រគល់ជូនពានរង្វាន់បាល់ទាត់ U១៣ ដល់កីឡាករជ័យលាភី។ ឯកឧត្តមបានថ្លែងអំណរគុណ និងកោតសសើដល់ក្រុមកីឡាករ (ក្មួយៗ) ទាំងអស់ដែលបានរៀបចំការជួបជុំគ្នាជាមិត្តភាព ក្នុងការប្រគួតកីឡាបាល់ទាត់នាពេលនេះ ព្រោះថា កីឡានាំមកនូវសុខភាព សាមគ្គីភាព វិន័យ សណ្ដាប់ធ្នាប់ បង្កើនបញ្ញាស្មារតី កាយសម្បទាមាំមួន បង្កើននូវការទំនាក់ទំនងកិច្ចសហការ ទន្ទឹមនឹងនោះក្មួយៗត្រូវខិតខំរៀនសូត្រឱ្យបានពូកែដែលជាទំពាំងស្នងឬស្សី និងសូមប្រុងប្រយ័ត្នគ្រោះថ្នាក់អំពីបញ្ហាជំនន់ទឹកភ្លៀង និងត្រូវអរគុណសន្តិភាព ពិសេសសម្ដេចអគ្គសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជាស្ថាបនិកនយោបាយឈ្នះឈ្នះ ធ្វើឲ្យប្រទេសជាតិ បានសុខសន្តិភាព អភិវឌ្ឍន៍រីកចំរើនដល់បច្ចប្បន្ននេះ ហើយចូលរួមទប់ស្កាត់ល្បែងស៊ីសង គ្រឿងញៀនគ្រប់ប្រភេទ និងគោរពឲ្យបាននូវគោលការណ៍ណែនាំរបស់រាជរដ្ឋាភិបាល ក៏ដូចជាក្រសួងសុខាភិបាល នូវវិធានការការពារជំងឺកូវីដ-១៩។