ថ្ងៃទី១០ ខែកុម្ភៈ ឆ្នាំ២០២២ លោកជំទាវ ចឹក ហេង សមាជិកាព្រឹទ្ធសភាប្រចាំភូមិភាគទី៨ បានចុះសំណេះសំណាល និងសួរសុខទុក្ខក្រុមប្រឹក្សាឃុំ ប៉ូលីសប៉ុស្តិ៍ និងស្មៀននៅសាលាឃុំស្តៅ ស្រុកសង្គមថ្មី ខេត្តព្រះវិហារ និងតំណាងក្រុមប្រឹក្សាឃុំរណសិរ្យ ដោយរួមដំណើរជាមួយលោក ហួន លី អភិបាលរងស្រុកសង្គមថ្មី។ ក្នុងពិធីសំណេះសំណាលនោះលោកជំទាវបានថ្លែងអំណរគុណចំពោះការខិតខំប្រឹងប្រែងបំពេញការងារប្រចាំថ្ងៃ និងការផ្តាំផ្ញើសួរសុខទុក្ខរបស់សម្តេចប្រធានព្រឹទ្ធសភា ដល់លោកមេឃុំ សមាជិកក្រុមប្រឹក្សាឃុំទាំងអស់។ ក្រោយពីបានស្តាប់របាយការណ៍លោកមេឃុំ និងសមាជិករួច លោកជំទាវ បានមានប្រសាសន៍សូមអោយក្រុមប្រឹក្សាឃុំទាំងអស់
ផ្តល់សេវាជូនប្រជាពលរដ្ឋអោយទាន់ពេលវេលា និងផ្សព្វផ្សាយពីភូមិឃុំ មានសុវត្ថិភាព អប់រំបញ្ហាសុខភាពសំរាប់ស្ត្រី និងកុមារ នាំគ្នាទទួលការចាក់វ៉ាក់សាំងកូវីដ-១៩ តាមការកំណត់របស់ក្រសួងសុខាភិបាល ។ ក្នុងពេលនោះលោកជំទាវបានឧបត្ថម្ដម៉ាស់ចំនួន ២៥០ម៉ាស់ និងឧបត្ថម្ភថវិកាដល់អ្នកចូលរួម ចំនួន១១នាក់ ដោយម្នាក់ៗទទួលបានថវិកាចំនួន ២០ ០០០រៀល និងនាំយកតេស្តកូវីដ១៩ របស់សម្តេចប្រធានព្រឺទ្ធសភា ជូនឃុំស្តៅ ចំនួន ០៣ប្រអប់ និងជូនឃុំរណសិរ្យ ម៉ាស់ចំនួន ០៥ប្រអប់ តេស្តកូវីដ-១៩ ចំនួន ០៣ប្រអប់ និងថវិកា ៤០០០០រៀល។