គណៈកម្មការទី៤ព្រឹទ្ធសភា អញ្ជើញទស្សនកិច្ចកំពង់ផែស្វយ័តក្រុងព្រះសីហនុ
ក្នុងឱកាសបំពេញបេសកកម្មនៅខេត្តព្រះសីហនុ នារសៀលថ្ងៃទី១៣ ខែកុម្ភៈ ឆ្នាំ២០២៣ គណៈកម្មការកិច្ចការមហាផ្ទៃ ការពារជាតិ ទំនាក់ទំនងរដ្ឋសភា ព្រឹទ្ធសភា អធិការកិច្ច និងមុខងារសាធារណៈ នៃព្រឹទ្ធសភា (គណៈកម្មការទី៤) ដឹកនាំដោយឯកឧត្តម សុខ ឥសាន ប្រធានគណៈកម្មការ បានអញ្ជើញទស្សនកិច្ច និងជួបពិភាក្សាការ ងារជាមួយគណៈគ្រប់គ្រងកំពង់ផែស្វយ័តក្រុងព្រះសីហនុ ដឹកនាំដោយឯកឧត្តម លូ គឹមឈន់ ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានអគ្គនាយក ក្នុងគោលបំណងឈ្វេងយល់អំពីវឌ្ឍនភាពការងាររបស់កំពង់ផែស្វយ័តក្រុងព្រះសីហុន។
សូមជម្រាបថា កំពង់ផែស្វយ័តខេត្តព្រះស៊ីហនុ ត្រូវបានសាងសង់លើកដំបូងនៅឆ្នាំ១៩៥៦ ហើយចាប់ផ្ដើមបន្តប្រតិបត្តិការ អាជីវកម្មជាថ្មីឡើងវិញ ក្រោយឆ្នាំ១៩៧៩ ដោយប្រតិបត្តិការនៅពេលនោះ ផ្ដើមចេញពីទ្រង់ទ្រាយតូច តាមរយៈការប្រើប្រាស់កម្លាំងកម្មករ ធនធានមនុស្សផ្ទាល់ សម្ភារបរិក្ខារ និងមធ្យោបាយគ្រឿងចក្រ ធម្មតា ដើម្បីធ្វើការលើកដាក់ទំនិញកុងតេន័រ និងបម្រើឱ្យការដឹកជញ្ជូនរបស់ខ្លួន។ ចាប់តាំងពីពេលនោះមកដោយមានការសិក្សា និងការធ្វើឲ្យប្រសើរឡើងជាបន្តបន្ទាប់ព្រមទាំងជំនួយបច្ចេកទេស ពីបណ្ដាភ្នាក់ងារអភិវឌ្ឍន៍ និងប្រទេសជាបងប្អូនជាច្រើនផ្សេងទៀត កំពង់ផែបានរីកចម្រើន និងបោះជំហានទៅមុខឥតឈប់ឈរ៕
ប្រភព៖ នាយកដ្ឋានព័ត៌មាន
អត្ថបទពាក់ព័ន្ធ
