នាព្រឹកថ្ងៃទី២៥ ខែមេសា ឆ្នាំ២០២៣ នៅសាលប្រជុំពិសេស៣ វិមានព្រឹទ្ធសភា ឯកឧត្តម អ៊ុំ សារឹទ្ធ អគ្គលេខាធិការព្រឹទ្ធសភា តំណាងដ៏ខ្ពង់ខ្ពស់របស់សម្តេចវិបុលសេនាភក្តី សាយ ឈុំ ប្រធានព្រឹទ្ធសភានៃព្រះរាជាណាចក្រកម្ពុជា បានអនុញ្ញាតឱ្យនិស្សិតជ័យលាភីអាហារូបករណ៍របស់រាជរដ្ឋាភិបាលប្រទេសអូស្រ្តាលីចំនួន១៤នាក់ ចូលជួបសំណេះសំណាល និងទទួលអនុសាសន៍ មុននឹងចេញដំណើរទៅសិក្សាថ្នាក់បរិញ្ញាបត្រជាន់ខ្ពស់ នៅតាមសាកលវិទ្យានានា នៃប្រទេសអូស្រ្តាលី។ សូមជម្រាបថា រដ្ឋាភិបាលអូស្ត្រាលីបានផ្តល់អាហារូបករណ៍ Australia Awards Cambodia ដល់និស្សិតនៅកម្ពុជា អស់រយៈពេល២៨ឆ្នាំមកហើយ។ សម្រាប់ឆ្នាំ២០២៣នេះ បេក្ខជនជ័យលាភីសរុបដែលត្រូវបានជ្រើសរើសមានចំនួន៤៥រូប (នារី២៣រូប) ដោយក្នុងនោះបេក្ខជនចំនួន០២រូប បន្តការសិក្សាថ្នាក់បណ្ឌិត និង៤៣រូបបន្តការសិក្សាថ្នាក់បរិញ្ញាបត្រជាន់ខ្ពស់។ គួរបញ្ជាក់ផងដែរថា និសិ្សតជ័យលាភីទាំង៤៥រូប នេះត្រូវបានចែកចេញជាពីរក្រុម ដោយក្រុមទី១មានចំនួន៣០នាក់ បានចេញដំណើរទៅបន្តការសិក្សានៅក្នុងប្រទេសអូស្រ្តាលីនាដើមខែមករា ឆ្នាំ២០២៣ និងក្រុមទី២ មានចំនួន១៥នាក់ គ្រោងនឹងចេញដំណើរទៅបន្តការសិក្សានៅអំឡុងខែមិថុនា ឆ្នាំ២០២៣ខាងមុខនេះ៕ ប្រភព៖ នាយកដ្ឋានព័ត៌មាន
