នាព្រឹកថ្ងៃទី១៤ ខែកញ្ញា ឆ្នាំ២០២៣ គណៈកម្មការអប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍ នៃព្រឹទ្ធសភា (គណៈកម្មការទី៧) ដឹកនាំដោយ ឯកឧត្តមកិត្តិនីតិកោសលបណ្ឌិត ម៉ុម ជឹមហ៊ុយ ប្រធានគណៈកម្មការ បានអញ្ជើញជួបពិភាក្សាការងារជាមួយអាជ្ញាធរខេត្តក្រចេះ ដឹកនាំដោយឯកឧត្តម វ៉ា ថន អភិបាល នៃគណៈអភិបាលខេត្ត និងមន្ទីរជំនាញពាក់ព័ន្ធវិស័យជាសមត្ថកិច្ច ដើម្បីឈ្វេងយល់អំពីស្ថានភាពទូទៅ វឌ្ឍនភាពការងារ បញ្ហាប្រឈម ទិសដៅការងារបន្តរបស់រដ្ឋបាលខេត្ត និងវិស័យពាក់ព័ន្ធជាសមត្ថកិច្ចរបស់គណៈកម្មការ នៅសាលាខេត្តក្រចេះ។
ក្រោយពីបានស្តាប់របាយការណ៍របស់ឯកឧត្តមអភិបាលខេត្តរួចមក ឯកឧត្តមកិត្តិនីតិកោសលបណ្ឌិត ម៉ុម ជឹមហ៊ុយ បានមានប្រសាសន៍ពាំនាំនូវការផ្តាំផ្ញើសួរសុខទុក្ខពីសំណាក់ថ្នាក់ដឹកនាំព្រឹទ្ធសភា ជូនចំពោះ ថ្នាក់ដឹកនាំខេត្ត មន្ត្រីរាជការ និងប្រជាពលរដ្ឋទូទាំងខេត្តក្រចេះ។ ឯកឧត្តមកិត្តិនីតិកោសលបណ្ឌិត បានកោតសរសើរ និងបានវាយតម្លៃខ្ពស់ចំពោះរបាយការណ៍ប្រកបដោយក្តីសង្ឃឹមរបស់គណៈកម្មការក្នុងការចូលរួមអភិវឌ្ឍប្រទេសជាតិ ព្រមទាំងជម្រាបជូនពីសភាពការណ៍សកលលោកប្រកបដោយភាពស្មុគស្មាញ ភាពមិនប្រាកដប្រជានៃសង្រ្គាម ការប្រកួតប្រជែងភូមិសាស្ត្រនយោបាយ បញ្ហាសុខភាពសាធារណៈ និងការប្រែប្រួលអាកាសធាតុ និងផ្តល់នូវអនុសាសន៍គន្លឹះមួយចំនួនពាក់ព័ន្ធវិស័យ សម្រាប់ជាត្រីវិស័យយកទៅអនុវត្តការងារបន្តឱ្យសម្រេចបានតាមផែនការយុទ្ធសាស្ត្ររបស់ខ្លួន៕

ប្រភព៖នាយកដ្ឋានព័ត៌មាន