នាព្រឹកថ្ងៃអង្គារ ១១រោច ខែភទ្របទ ឆ្នាំថោះ បញ្ចស័ក ពុទ្ធសករាជ២៥៦៧ ត្រូវនឹងថ្ងៃទី១០ ខែតុលា ឆ្នាំ២០២៣ ក្រុមសមាជិកាព្រឹទ្ធសភា ដឹកនាំដោយលោកជំទាវ មាន សំអាន ប្រធានក្រុម និងជាប្រធានគណៈកម្មការទី៨ព្រឹទ្ធសភា បានអញ្ជើញនាំយកនូវគ្រឿងឧបភោគ បរិភោគ ចង្ហាន់បិណ្ឌបាត និងបច្ច័យ ចូលរួមក្នុងពិធីបុណ្យកាន់បិណ្ឌវេនទី១១ នៅវត្តចំនួន០៥ រួមមាន៖ វត្តស្វាយទាប វត្តពោធិសត្ថារាម ហៅវត្តពានា វត្តឧត្តមពោធិ៍និស្ស័យ ហៅវត្តក្បាលបឹង វត្តសេរីមង្គលអំពិលក្រៅ វត្តទួលមានជ័យ ហៅវត្តទួលជ្រៃ ស្ថិតក្នុងឃុំអំពិលក្រៅ ស្រុកស៊ីធរកណ្ដាល ខេត្តព្រៃវែង។ នាឱកាសដ៏ថ្លៃថ្លានោះ ក្រុមសមាជិកាព្រឹទ្ធសភា បានអញ្ជើញថ្វាយនូវគ្រឿងសក្ការៈបូជា ទៀន ធូប ផ្កាភ្ញី និងប្រារព្ធកិច្ចបទនមស្ការព្រះរតនត្រ័យ សមាទាននិច្ចសីល និមន្តព្រះសង្ឃសូត្រព្រះធម៌ស្វាធ្យាយ ចម្រើនព្រះបរិត្ត និងពុទ្ធជ័យមង្គល ព្រមទាំងនាំយកចង្ហាន់ ទេយ្យទាន គ្រឿងបរិក្ខារ រាប់បាត វេប្រគេនព្រះសង្ឃ ដើម្បីឧទ្ទិសមហាកុសលផលបុណ្យ ដែលកើតពីសទ្ធាជ្រះថ្លាទាំងនេះ ជូនចំពោះដួងវិញ្ញាណក្ខន្ធញាតិកាទាំងប្រាំពីរសន្តាន ជាពិសេសជូនចំពោះដួងវិញ្ញាណក្ខន្ធអតីតថ្នាក់ដឹកនាំ អតីតសមាជិក សមាជិកាព្រឹទ្ធសភា ឥស្សរជន និងយុទ្ធជន ដែលបានពលីជីវិត ដើម្បីបុព្វហេតុជាតិមាតុភូមិ សូមឱ្យជួបប្រកបតែវិបុលសុខគ្រប់ប្រការ និងទៅកាន់សុគតិភពកុំបីឃ្លៀងឃ្លាតឡើយ។ ទេយ្យទាន គ្រឿងបរិក្ខារផ្សេងៗ ដែលក្រមសមាជិកាព្រឹទ្ធសភាបាននាំមកប្រគេនដល់ព្រះសង្ឃទាំង០៥វត្ត នាពេលនោះ រួមមាន៖ អង្ករ មី ទឹកបរិសុទ្ធ ទឹកក្រូច ទឹកផ្លែឈើ ទឹកត្រី ទឹកស៊ីអ៊ីវ ត្រីខ ផ្លែឈើ នំអន្សមខ្មែរ នំបាញ់ហ៊យ និងទេយ្យទានផ្សេងៗទៀត ព្រមទាំងបច្ច័យប្រគេនកសាងវត្តទាំង០៥ ក្នុងមួយវត្តៗចំនួន ១លាន៥០ម៉ឺនរៀលផងដែរ៕ ប្រភព៖នាយកដ្ឋានព័ត៌មាន
