នាព្រឹកថ្ងៃទី៣០ ខែតុលា ឆ្នាំ២០២៣ អគ្គលេខាធិការដ្ឋានព្រឹទ្ធសភា បានរៀបចំពិធីសំណេះសំណាលជាមួយនឹងនិវត្តជន និងមន្ត្រីរាជការវ័យចំណាស់នៃអគ្គលេខាធិការដ្ឋានព្រឹទ្ធសភា ក្រោមប្រធានបទ ទិវាមនុស្សចាស់កម្ពុជា និងទិវាមនុស្សចាស់អន្តរជាតិលើកទី២៥ ថ្ងៃទី០១ តុលា ឆ្នាំ២០២៣ ត្រូវបានកំណត់ថា ការជួយមនុស្សចាស់ គឺជួយយើងទាំងអស់គ្នា នៅសាលសិក្ខាសាលាបណ្ណាល័យព្រឹទ្ធសភា។
ពិធីនេះប្រព្រឹត្តទៅក្រោមអធិបតីភាពឯកឧត្តម ឡោក ឆាយ អគ្គលេខាធិការរងព្រឹទ្ធសភា ដោយមានការអញ្ជើញពីថ្នាក់ដឹកនាំអង្គភាពចំណុះអគ្គលេខាធិការដ្ឋានព្រឹទ្ធសភា និវត្តជន និងមន្ត្រីរាជការវ័យចំណាស់សរុបចំនួន២០៥នាក់។
អង្គពិធីដំណើរការដោយមានការបញ្ចាំងវីដេអូស្តីពីសកម្មភាពសួរសុខទុក្ខនិវត្តជន មន្ត្រីរាជការលំហែមាតុភាព មានជំងឺ និងជួបហានិភ័យផ្សេងៗ ព្រមទាំងចំណាប់អារម្មណ៍តំណាងនិវត្តជនដោយឯកឧត្តម មាន សុខុម និងចំណាប់អារម្មណ៍តំណាងមន្ត្រីរាជការវ័យចំណាស់ដោយលោកស្រី ផន វណ្ណារីវណ្ណ ប្រធានលេខាធិការដ្ឋានអមគណៈកម្មការទី៥ព្រឹទ្ធសភា និងមតិសំណេះសំណាលរបស់ឯកឧត្តម ឡោក ឆាយ អគ្គលេខាធិការរងព្រឹទ្ធសភាផងដែរ។

ប្រភព៖នាយកដ្ឋានព័ត៌មាន