នាព្រឹកថ្ងៃទី០១ ខែវិច្ឆិកា ឆ្នាំ២០២៣ នៅសាលប្រជុំពិសេស៣ វិមានព្រឹទ្ធសភា ឯកឧត្តម អ៊ុំ សារឹទ្ធ អគ្គលេខាធិការព្រឹទ្ធសភា តំណាងដ៏ខ្ពង់ខ្ពស់របស់សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា បានអនុញ្ញាតឱ្យប្រតិភូយុវជន និងថ្នាក់ដឹកនាំសមាគមនាវាយុវជនអាស៊ីអាគ្នេយ៍កម្ពុជាចំនួន១៥រូប ចូលជួបសំណេះសំណាល និងទទួលអនុសាសន៍ មុននឹងចេញដំណើរទៅចូលរួមក្នុងកម្មវិធីនាវាយុវជនអាស៊ីអាគ្នេយ៍និងជប៉ុន SSEAYP (Ship for Southeast Asian and Japanese Youth Program) នៅទីក្រុងតូក្យូ ប្រទេសជប៉ុន។
សមាគមនាវាយុវជនអាស៊ីអាគ្នេយ៍កម្ពុជា នឹងចូលរួមក្នុងកម្មវិធីនាវាយុវជនអាស៊ីអាគ្នេយ៍និងជប៉ុន នៅថ្ងៃទី១២-១៩ ខែវិច្ឆិកា ឆ្នាំ២០២៣ តាមប្រព័ន្ធអនឡាញ និងនៅថ្ងៃទី២៩ ខែវិច្ឆិកា ដល់ថ្ងៃទី៨ ខែធ្នូ ឆ្នាំ២០២៣ នៅទីក្រុងតូក្យូ ប្រទេសជប៉ុន ដោយមានប្រតិភូយុវជនមកពីប្រទេសក្នុងតំបន់អាស៊ានចំនួន១១រូប ក្នុងមួយប្រទេស នឹងផ្តោតសំខាន់លើការប្រារព្ធខួបទី៥០ នៃចំណងមិត្តភាព និងកិច្ចសហប្រតិបត្តិការអាស៊ាន-ជប៉ុន។ កម្មវិធីនាវាយុវជនអាស៊ីអាគ្នេយ៍និងជប៉ុន គឺជាកម្មវិធីផ្លាស់ប្តូរយុវជនអន្តរជាតិដ៏ចម្បងមួយក្នុងតំបន់អាស៊ី ដែលត្រូវបានបង្កើតឡើងក្នុងឆ្នាំ១៩៧៤ ដោយមានយុវជនមកពីបណ្តាប្រទេសទាំង ១០ ក្នុងតំបន់អាស៊ាន និងប្រទេសជប៉ុន សរុបចំនួន៣៣០ រូប ចូលរួមជារៀងរាល់ឆ្នាំ។

ប្រភព៖ នាយកដ្ឋានព័ត៌មាន