នារសៀលថ្ងៃទី១៨ ខែធ្នូ ឆ្នាំ២០២៣ គណៈប្រតិភូគណៈកម្មការកិច្ចការបរទេស សហប្រតិបត្តិអន្តរជាតិ ឃោសនាការ និងព័ត៌មាននៃព្រឹទ្ធសភា (ហៅកាត់គណៈកម្មការទី៥) ដឹកនាំដោយ លោកជំទាវកិតិ្តនីតិកោសលបណ្ឌិត ទី បូរ៉ាស៊ី ប្រធានគណៈកម្មការ អមដំណើរដោយឯកឧត្តម ម៉ៅ ធនិន អភិបាល នៃគណៈអភិបាលខេត្តកំពត បានអញ្ជើញសិក្សាស្វែងយល់ស្ថានភាពមជ្ឈមណ្ឌលភស្តុភារកម្ម និងកំពង់ផែពហុបំណងរបស់ក្រុមហ៊ុនកំពតឡូជីស្ទីកអេនផត ឯ.ក ស្ថិតនៅភូមិចង្ហោន ឃុំព្រែកត្នោត ក្រុងបូកគោ ខេត្តកំពត។
ក្នុងឱកាសនោះ ក៏មានការធ្វើបទបង្ហាញដោយលោក យឹម លី អភិបាលក្រុមហ៊ុនកំពតឡូជីស្ទីកអេនផត ឯ.ក អំពីដំណើរការទូទៅ នៃគម្រោងសាងសងមជ្ឈមណ្ឌលភស្តុភារកម្ម និងកំពង់ផែពហុបំណងរបស់ក្រុមហ៊ុនកំពតឡូជីស្ទីកអេនផត ឯ.ក ខេត្តកំពត។
សូមជម្រាបថា មជ្ឈមណ្ឌលភស្តុភារកម្ម និងកំពង់ផែពហុបំណង របស់ក្រុមហ៊ុនកំពត ឡូជីស្ទីក អេន ផត គឺជាក្រុមហ៊ុនទទួលបានសិទ្ធិសម្បទាន ដើម្បីអភិវឌ្ឍន៍កំពង់ផែ និងតំបន់សេដ្ឋកិច្ចពាក់ព័ន្ធនៅក្នុងខេត្តកំពត។
គម្រោងនេះស្ថិតនៅក្នុងតំបន់មានអំណោយផល ក្នុងការតភ្ជាប់ប្រព័ន្ធដឹកជញ្ជូនផ្លូវទឹក ផ្លូវគោក និងផ្លូវដែក មកកាន់រាជធានីភ្នំពេញ និងតាមបណ្តាខេត្តនានា តាមរយៈផ្លូវជាតិលេខ៣ ផ្លូវជាតិលេខ៤១ ផ្លូវជាតិលេខ៤ ផ្លូវល្បឿនលឿនភ្នំពេញ-ក្រុងព្រះសីហនុ ផ្លូវជាតិលេខ៤៨ និងតភ្ជាប់ផ្លូវដែកភាគខាងត្បូង ទៅភាគខាងជើងនៃប្រទេសកម្ពុជា។
ប្រភព៖នាយកដ្ឋានព័ត៌មាន
