នារសៀលថ្ងៃទី០៦ ខែមិថុនា ឆ្នាំ២០២៤ វេលាម៉ោង ១៤:៣០នាទី គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃព្រឹទ្ធសភា (គណៈកម្មការទី២) ដឹកនាំដោយឯកឧត្តមបណ្ឌិត ធន់ វឌ្ឍនា ប្រធានគណៈកម្មការ និងគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃព្រឹទ្ធសភា (គណៈកម្មការទី៥) ដឹកនាំដោយឯកឧត្តមបណ្ឌិត ចែម វីឌ្យ៉ា ប្រធានគណៈកម្មការ បានជួបប្រជុំគ្នាក្នុងគោលបំណងបង្កើនភាពស្និទ្ធស្នាល ការប្រាស្រ័យទាក់ទងគ្នា និងពិនិត្យពិភាក្សាលើរូបភាព និងឱកាស ដែលគណៈកម្មការទាំងពីរអាចសហការគ្នាក្នុងការបំពេញភារកិច្ចដ៏ឧត្តុង្គឧត្តម សម្រាប់ព្រឹទ្ធសភា នីតិកាលទី៥ នៅសាលប្រជុំគណៈកម្មការទី៥ព្រឹទ្ធសភា។
គណៈកម្មការទាំងពីរមានទស្សនវិស័យយល់ឃើញដូចគ្នាក្នុងការធ្វើការងាររួមគ្នា ដោយផ្តោតសំខាន់ទៅលើការលើកកម្ពស់ការទូតសភា ដើម្បីជាផ្នែកមួយនៃការជួយជម្រុញកំណើនសេដ្ឋកិច្ចកម្ពុជា និងការរួមប្រាស្រ័យឱ្យកាន់តែជិតស្និទ្ធជាមួយប្រជាពលរដ្ឋ ដើម្បីបង្កើននូវប្រសិទ្ធភាព និងលទ្ធផលការងារល្អ សម្រាប់បម្រើនូវឧត្តមប្រយោជន៍ជាតិ និងប្រជាជន។
ប្រភព៖ នាយកដ្ឋានព័ត៌មាន
