ឯកឧត្តម ម៉ម ប៊ុននាង ប្រធានណៈកម្មការអង្កេត បោសសម្អាត និងប្រឆាំងអំពើពុករលួយនៃព្រឹទ្ធសភា (គណៈកម្មការទី១០) និងលោកជំទាវ អញ្ជើញជាអធិបតីភាពក្នុងពិធីដង្ហែ និងផ្តល់ភ្លើងបូជាសពមហាឧបាសិកា ពុទ្ធសាសនូបត្ថម្ភក៍ ឯម ជា ដោយមានការអញ្ជើញចូលរួមពីអ្នកមុខអ្នកការ និងបងប្អូនញាតិមិត្តជិតឆ្ងាយ នៃក្រុមគ្រួសារសពជាច្រើននាក់ផ្តល់ជាកិត្តិយសនាពេលចុងក្រោយ នៅវត្តចង្ក្រានតាព្រហ្ម (ហៅវត្តស្ទឹងមានជ័យ) ដែលស្ថិតនៅសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ នារសៀលថ្ងៃទី១២ ខែមិថុនា ឆ្នាំ២០២៤។ ក្នុងឱកាសដ៏សែនក្រៀមក្រំនេះ ក៏មានការអញ្ជើញពីក្រុមគ្រួសារសព និងនិមន្តព្រះសង្ឃធ្វើពិធីអង្គស្វាធ្យាយ ព្រះសត្តប្បករណ៍ ដង្ហែប្រទក្សិណសពបីជុំមេរុ និងលោក ខាន់ សំណាង តំណាងក្រុមគ្រួសារសព អាននូវវិយោគកថា និងជីវប្រវត្តិរបស់មហាឧបាសិកាពុទ្ធសាសនូបត្ថម្ភក៍ ឯម ជា ព្រមទាំងគោរពវិញ្ញាណក្ខន្ធជាកិច្ចបច្ឆាមរណៈ។ បន្ទាប់មកឯកឧត្តម ម៉ម ប៊ុននាង ប្រធានគណៈកម្មការទី១០ព្រឹទ្ធសភា បានអញ្ជើញផ្តល់ភ្លើងបូជាសពមហាឧបាសិកាពុទ្ធសាសនូបត្ថម្ភក៍ ឯម ជា រួចមកលោក ធុល នាង តំណាងក្រុមគ្រួសារសព បានឡើងថ្លែងអំណរគុណដល់ភ្ញៀវកិត្តិយសទាំងអស់ដែលបានផ្ដល់កិត្តិយស ចូលរួមក្នុងពិធីបុណ្យ និងបូជាសពនាពេលនេះ។ សូមជម្រាបថាសពមហាឧបាសិកា ពុទ្ធសាសនូបត្ថម្ភក៍ ឯម ជា បានទទួលមរណភាព កាលពីថ្ងៃទី៩ ខែមិថុនា ឆ្នាំ២០២៤ ក្នុងជន្មាយុ៩៣ឆ្នាំ ដោយជរាពាធ។
ប្រភព៖ នាយកដ្ឋានព័ត៌មាន
