នាព្រឹកថ្ងៃទី១៣ ខែមិថុនា ឆ្នាំ២០២៤ វេលាម៉ោង ៨:៣០នាទី គណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃព្រឹទ្ធសភា (គណៈកម្មការទី៨) ដឹកនាំដោយលោកជំទាវ មាន សំអាន ប្រធានគណៈកម្មការ បានទទួលជួបសំណេះសំណាល និងពិភាក្សាការងារជាមួយគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃព្រឹទ្ធសភា (គណៈកម្មការទី២) ដឹកនាំដោយឯកឧត្តមបណ្ឌិត ធន់ វឌ្ឍនា ប្រធានគណៈកម្មការ ក្នុងគោលបំណងបង្កើតនូវទំនាក់ទំនងស្និទ្ធស្នាល សាមគ្គីភាព និងកិច្ចសហការគ្នាល្អ ដើម្បីពិនិត្យលើរូបភាព និងឱកាស សម្រាប់គណៈកម្មការទាំងពីរអាចរួមគ្នាបំពេញភារកិច្ចដ៏ឧត្តុង្គឧត្តមសម្រាប់ព្រឹទ្ធសភា នីតិកាលទី៥ នៅសាលប្រជុំគណៈកម្មការទី៨ ព្រឹទ្ធសភា។
ជំនួបនេះពិតជាមានសារៈសំខាន់ និងផ្តល់អត្ថប្រយោជន៍លើការងារសហការ និងការកសាងស្ថាប័ន ហើយក៏ជាលើកទី១ សម្រាប់គណៈកម្មការទី៨ ចាប់ពីព្រឹទ្ធសភា នីតិកាលទី១ មក មិនដែលមានជំនួបរវាងគណៈកម្មការនិងគណៈកម្មការយ៉ាងស្និទ្ធស្នាលបែបនេះទេ។ គណៈកម្មការទាំងពីរអាចមានលទ្ធភាពសហការគ្នាក្នុងរូបភាពជាច្រើនមានជាអាទិ៍ ៖ វិស័យសេដ្ឋកិច្ច សុខាភិបាល ការងារ បណ្ដុះបណ្ដាលវិជ្ជាជីវៈ ជាអាទិភាព។
ជាការពិតណាស់ នៅក្រោមម្លប់សន្តិភាព គឺប្រជាពលរដ្ឋត្រូវមានសុខភាព ការងារ និងជីវភាពធូរធារ។
ប្រភព៖ នាយកដ្ឋានព័ត៌មាន