គណៈកម្មការទី៥ព្រឹទ្ធសភា ស្តាប់សេចក្តីរាយការណ៍អំពីវឌ្ឍនភាពការងាររបស់អគ្គនាយកដ្ឋានពិធីការ និងទំនាក់ទំនងអន្តរជាតិ និងបន្តប្រជុំផ្ទៃក្នុងគណៈកម្មការ
គណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃព្រឹទ្ធសភា (គណៈកម្មការទី៥) ដឹកនាំដោយឯកឧត្តមបណ្ឌិត ចែម វីឌ្យ៉ា ប្រធានគណៈកម្មការ បានអញ្ជើញស្តាប់ការធ្វើសេចក្តីរាយការណ៍អំពីវឌ្ឍនភាពការងាររបស់អគ្គនាយកដ្ឋានពិធីការ និងទំនាក់ទំនងអន្តរជាតិ និងបន្តកិច្ចប្រជុំផ្ទៃក្នុងគណៈកម្មការ ដើម្បីពិនិត្យ និងពិភាក្សាលើរបៀបវារៈចំនួន០៥រួមមាន៖
១.ស្តាប់ការធ្វើសេចក្តីរាយការណ៍របស់ឯកឧត្តម ងួន សុខវេង អគ្គនាយកនៃអគ្គនាយកដ្ឋានពិធីការ និងទំនាក់ទំនងអន្តរជាតិ អំពីវឌ្ឍនភាពការងាររបស់អគ្គនាយកដ្ឋានពិធីការ និងទំនាក់ទំនងអន្តរជាតិ។
២-បូកសរុបរបាយការណ៍សកម្មភាពការងារប្រចាំខែមិថុនា និងត្រីមាសទី២ ឆ្នាំ២០២៤។
៣.បូកសរុបរបាយការណ៍ចំណូល-ចំណាយថវិកាប្រចាំត្រីមាសទី២ ឆ្នាំ២០២៤។
៤.រាយការណ៍ដំណើរការវិវត្តការចុះបេសកកម្មទៅខេត្តបាត់ដំបង។
៥.បញ្ហាផ្សេងៗ ដោយមានការចូលរួមជាមតិយោបល់របស់សមាជិកក្នុងអង្គប្រជុំ។
កិច្ចប្រជុំនេះ បានប្រព្រឹត្តទៅនាព្រឹកថ្ងៃចន្ទ ទី១ ខែកក្កដា ឆ្នាំ២០២៤ វេលាម៉ោង០៩:០០នាទី នៅសាលប្រជុំគណៈកម្មការទី៥ព្រឹទ្ធសភា ៕
ប្រភព៖ នាយកដ្ឋានព័ត៌មាន
